Meta kundër ligjit të plehrave: Të vijnë ekspertët e BE për ta riparë

Kryetari i LSI-së, Ilir Meta, ka dalë kundër ligjit të mbetjeve, duke e konsideruar debatin e krijuar si “të kuptueshëm dhe pozitiv” dhe në këtë këndvështrim, ka deklaruar se “përderisa e kemi pranuar BE-në, nuk kemi asnjë arsye pse të mos pranojmë një ekspertizë të huaj të BE në këtë drejtim”.

Meta e ka mbajtur këtë qendrim sot në Komitetin Drejtues Kombëtar të LSI, ku ka shpalosur platformën e tij në garën për kryetar, krahas dy kandidatëve të tjerë: Shezai Rrokaj dhe Përparim Spahiu.

“Ka mjaft debate për ligjin për mbetjet, – tha Meta. – Edhe ky është debat i kuptueshëm dhe pozitiv se tregon ndjeshmëri për rritjen e ndërgjegjësimit të shoqërisë ,sidomos ndaj turizmit dhe mbrojtjes së tij. Qëllimi ynë nuk ka qenë për gjetur zgjidhje oportuniste, por parimore, ndaj kemi kërkuar dialog të ngushtë me shoqërinë civile dhe jemi në një situatë ku kemi dhe interpretime të ndryshëm të direktivave të BE-së. Përderisa e kemi pranuar BE-në, nuk kemi asnjë arsye pse të mos pranojmë një ekspertizë të huaj të BE-së në këtë drejtim, sepse miratimi i ligjeve në mënyrë konfliktuale edhe kur kundërshtia vjen nga opozita, nuk është pozitiv për shoqërinë. Por besojmë edhe se çështja e mjedisit u takon të gjithëve dhe nuk humbasim asgjë nga një dialog shterues, nga një ekspertizë shteruese dhe dhënia e garancive reciproke për të mos u kthyer pas.”

NGA FJALA E Z.META

Ky është momenti më i rëndësishëm për LSI për të kuptuar, për të gjetur vetveten dhe objektivat e saj në të ardhmen që të jetë në lartësinë e kohës dhe sfidave.

Për këtë, në radhë të parë duhet një LSI më e organizuar sesa tani, me struktura shumë më të qëndrueshme se deri tani, që hapet, dhe me rritjen e cilësisë së përfaqësimit në qeverisjen qëndrore dhe atë vendore.

Në këtë proces jemi pak vonë për shkak të angazhimit tonë të madh për shkak të reformës në Drejtësi dhe shumë angazhimeve të tjera, megjithatë besoj se jemi në kohën e duhur.

Në këto 16 ditë që kanë ngelur deri në zgjedhjet e 6 nëntorit , mbeten për të reflektuar gjithçka kemi dëgjuar pavarësisht se mund të mendojmë edhe ndryshe.

Duhet të forcojmë në mënyrë të veçantë lllogaridhënien e këtyre strukturave që vijnë duke u hapur por edhe duke u mbyllur në disa strukura lokale siç e kemi vënë re. Llogaridhënia duhet në mënyrë të përhershme dhe të vazhdueshme.

Unë mendoj se LSI, pavarësisht nga pretendimet e kolegëve dhe kandidatëve të nderuar për kryetar, është identifikuar qartë me stabilitetin politik të vendit dhe i ka shërbyer këtij stabiliteti si dhe me vullnetin e saj për t’i qëndruar marrëveshjeve, përfshirë asaj me koalicionin qeverisës, në mënyrë luajale.

Edhe në rastin e Reformës Territoriale ka qenë shumë konkret insistimi i saj që kjo reformë të ishte sa më përfshirëse.

Tani është koha të kryejmë vlerësimin se cili është impakti i kësaj reforme, që nuk varet vetëm nga reforma, por edhe nga gatishmëria e të zgjedhurve vendore.

LSI duhet të bëjë një vlerësim sesi ka ecur kjo reformë.

Reforma në Drejtësi ka qenë një tjetër angazhim kryesor dhe insistimi ynë që të bëhet me konsensus, si edhe për Reformën Administrative Territoriale, ka qenë maksimal .

E kam thënë që kontributi ynë ka qenë jashtëzakonisht i rëndësishëm në këtë drejtim dhe dua të falenderoj kryetarin e grupit Parlamentar, z. Petrit Vasili.

Është shumë e rëndësishme të besojmë në një drejtësi që është sa më pak e cenuar nga gjykimi politik dhe se nuk ka gjykatës në Shqipëri apo në Komisionin e Venecias që të thojë se Kushtetuta e bërë para 18 vjetësh ishte më e mirë.

Do të marr shembull reformën në sistemin e lartë. Dihet që në rast se nuk do të zbatohej në mënyrën e duhur, nëse aktet nënligjore nuk do të ribëheshin me grupet e interesit, me akademikët, grupet e maturantëve, do të kishte shqetësime për suksesin e saj. Dhe praktikisht është hapur një debat që në fund të procesit do të japë konkluzione të qarta lidhur me efektivitetin e zbatimit të këtij ligji. Për ne gjithçka ka qenë lehtësisht e evitueshme nëse të gjithë aktet tjera do të ishin koordinuar në mënyrën e duhur që të kishim një përputhshmëri të sukseshme ndërmjet konkurencës dhe meritës.

Për ne nuk është çështje shifrash dhe statistikash, por edhe nëse një do të ishte lënduar, do të ishte ftesë serioze për rivlerësim të mënyrës së zbatimit të ligjit.”