Meta përçmon Idrizin: Në Shqipëri nuk ka parti serioze nacionaliste

Ilir Meta ka siluruar nga Greqia bashkëaletin në qeverisje, PDIU-në e Shpëtim Idrizit gjatë një interviste për marrëdhëniet mes dy vendeve dhe retorikën nacionaliste, në të dy anët e kufijve. Edhe pse nuk e ka specifikuar, pas zhvillimeve të fundit për çështjen çame, deklarimi se, “në Shqipëri nuk ka parti serioze me axhendë nacionaliste” duket hapur se i referohet partisë së çamëve.

Menjëherë pas deklaratës së Komisionerit për Zgjerim Johannes Hahn për njohjen e çështjes çame nga Bashkimi Europian, nga Athina pati një kundër reagim të ashpër, kurse në Tiranë Idrizi nxitoi të falenderojë zyrtarin e lartë të Be-së dhe ta proklamojë këtë hap, si një arritje të madhe të forcës së tij politike.

Kjo situatë e krijuar “papritur”, ja ka rritur edhe më shumë kredencialet PDIU-së në vend duke ditur se sa popullore është karta e nacionalizmit.

Këtë kartë përveç të tjerave, partia e Idrizit e përdori me sukses edhe në sprovën e vetë të parë të dhënë nga Rama në zgjedhjet e pjesshme të Dibrës, të cilën për “habi” të Ilir Metës e kaloi me sukses duke e zëvendësuar për këtë rast, më së miri rolin e LSI.

Në një intervistë për agjencinë “AMA” para se të nisej për vizitën e sotme zyrtare në Greqi, Meta i cilësoi ato forca politike që kanë retorikë nacionaliste në Shqipëri. me një nënvleftësim dhe përçmim të hapur:

“Për fat të mirë, nuk ka një parti politike serioze në Shqipëri me një axhendë nacionaliste…Marrëdhëniet midis Greqisë dhe Shqipërisë janë marrëdhënie me rëndësi strategjike, me shkëmbimeve praktike si dhe me rëndësi jetike për të dy shtetet…Të gjitha partitë shqiptare respektojnë shtetin grek, integritetin territorial të tij dhe natyrisht qytetarët e saj si fqinjë dhe partnerë të zhvillimit social, ekonomik dhe evropian. Mendoj se do të ishte vendimi i duhur për të qëndruar larg spekullimeve, që qëllimisht përpiqen të krijojnë perceptimet e gabuara”, komentoi Ilir Meta.