Meta i përgjigjet Idrizit: Gabimet dhe dëshirat për vëmendje mund të sjellin pasoja afatgjata

Kryetari i Parlamentit Ilir Meta i është përgjigjur Shpëtim Idrizit në lidhje me vizitën e kryeparlamentarit Meta në Athinë, i cili u kritikua nga PDIU për mënyrë se si trajtoi çështjen çame.

“Qeveritë që do të vijnë në të ardhmen në Greqi nuk besoj se do të jenë kaq shumë të predispozuara. Të heqim dorë nga përpjekjet nga çështje të tilla për t’i kthyer në shërbim të fushatës së ardhshme elektorale.

Deri tani nuk kam parë ndonjë forcë politike që të jetë e gatshme zyrtarisht për të diskutuar për këtë çështje, ndaj besoj se në këtë drejtim marrëdhëniet me fqinjët t’i trajtojmë me më shumë përgjegjshmëri. Për të zgjidhur çështje të tilla na duhet mbështetja e BE dhe partnerëve të tjerë ndërkombëtarë. Besoj që në raport me Greqinë është shumë e rëndësishme që ne të sillemi në mënyrë evropiane, ta paraqesim drejt këtë çështje, jo si një sfidë ndaj Greqisë, por çështja nuk zgjidhet në mënyrë të njëashme, por me mirëkuptim dhe mirëbesim.

Nuk duhet të harrojmë që marrëdhëniet me Greqinë janë jetike. Të gjithë në këtë sallë duhet të ngrihemi në një nivel më të lartë dhe nuk duhet të sillemi në mënyrë revanshiste. Kush të ketë dëshirë le të merret dhe mua, kjo nuk më shqetëson fare. Në politikën e jashtme, gabimet, emocionet apo dëshira për të tërhequr vëmendjen, mund të sjellë dhe pasoja afatgjata të cilat i vuajnë qytetarët dhe shumë pak politikanët”, tha kryetari i Parlamentit Ilir Meta.