Meta takon homologun kinez: Bashkëpunimi parlamentar forcon lidhjet mes dy vendeve

Kryetari i Kuvendit të Shqipërisë Ilir Meta dhe delegacioni parlamentar shqiptar në kuadër të vizitës së tij zyrtare në Kinë u prit sot në një takim të veçantë nga homologu i tij, Kryetari i Asamblesë Kombëtare Popullore të Kinës, Zhang Dejiang.

Gjatë takimit, Meta shprehu kënaqësinë e tij për këtë vizitë në Pekin dhe vlerësoi marrëdhëniet e veçanta miqësore e tradicionale që Shqipëria ka me Kinën. Gjithashtu, Kryetari i Kuvendit shprehu bindjen se kjo vizitë do t’i shërbejë intensifikimit të mëtejshëm të këtyre marrëdhënieve që mund të konsiderohen të shëndetshme, dinamike dhe të qëndrueshme.

“Bashkëpunimi parlamentar përbën një dimension të rëndësishëm dhe ka një rol të pazëvendësueshëm për të forcuar lidhjet midis dy vendeve dhe dy popujve tanë. Shkëmbimet e vizitave të nivelit të lartë mes dy parlamenteve do të duhet të shtrihen dhe të pasohen edhe nga ato të komisioneve të veçanta parlamentare dhe të grupeve të miqësisë”, – theksoi Meta, duke vënë në dukje faktin se në Kuvendin e Shqipërisë është krijuar edhe Grupi i Miqësisë Shqipëri-Kinë.

Meta konfirmoi politikën e palëkundur të Shqipërisë për një Kinë të vetme, atë të Republikës Popullore të Kinës, duke pohuar gjithashtu se Shqipëria ndihet krenare që ka kontribuar për t’i dhënë Kinës vendin që ajo meriton ne OKB.

Duke u ndalur në bashkëpunimin ekonomik dhe tregtar, Meta u shpreh se janë të mirëpritura edhe më shumë investime nga ky vend mik në fushat si bujqësia, turizmi dhe infrastruktura.

Në këtë kuadër janë të rëndësishme për të forcuar bashkëpunimin ekonomik dhe tregtar dypalësh nismat kineze “Një Brez një Rrugë” dhe ajo rajonale “16 + 1”, në të cilën Shqipëria është shumë e interesuar të luaj rolin e saj.

Kryetari i Asamblesë Kombëtare Popullore të Kinës, Zhang Dejiang, në fjalën e tij të mirëseardhjes nënvizoi kënaqësinë që Kryetari Meta vjen në vizitë zyrtare në Kinë dhe shprehu besimin se kjo vizitë do t’i shërbejë më tej intensifikimit të marrëdhënieve mes dy vendeve në fushat me interes reciprok.

Kryetari Zhang Dejiang theksoi se Kina nuk do të harrojë kontributin e Shqipërisë për të rifituar vendin e saj në OKB dhe se ajo do të jetë gjithmonë mirënjohëse, duke vlerësuar gjithashtu edhe qëndrimin e Shqipërisë për një Kinë të vetme.

Kryetari i Asamblesë Popullore të Kinës, pasi bëri një prezantim të reformave politike dhe ekonomike në Kinë, ndau bindjen me z. Meta për të shtuar më tej bashkëpunimin parlamentar në nivelet e komisioneve në interes të intensifikimit të marrëdhënieve politike mes dy vendeve tona.

Sakaq, Kryetari i Asamblesë Kombëtare Popullore të Kinës, z. Zhang Dejiang, siguroi se do të mbështesë kompanitë kineze për te investuar në Shqipëri.
Kryetari i Kuvendit të Shqipërisë, z. Ilir Meta e ftoi Kryetarin Zhang Dejiang për një vizitë zyrtare në Shqipëri, ftesë e cila u pranua me kënaqësi.

META TAKON NËNKRYETAREN E SHOQATËS SË KINËS PËR MARRËDHËNIE MIQËSORE NDËRKOMBËTAR
Në kuadër të vizitës së tij në Kinë, Kryetari i Kuvendit, Ilir Meta u takua me N/Kryetaren e Shoqatës së Kinës për Marrëdhënie Miqësore Ndërkombëtare, Deng Rong.

Znj. Rong është njëkohësisht vajza e Deng Xiaoping, liderit të njohur dhe reformatorit te madh te Kinës. Gjatë takimit, Meta vlerësoi figurën e Deng Xiaoping-ut, i cili udhëhoqi vendin e tij për një dekadë, duke ideuar dhe realizuar reformat me të thella në të gjitha vendin.

Deng Xiaoping e hapi Kinën për investimet e huaja dhe tregun botëror, dhe inkurajoi konkurrencën private.

Kryetari i Kuvendit i dhuroi Rong edhe librin e saj “Deng Xiaoping dhe Revolucioni Kulturor” të përkthyer në gjuhën shqipe,

Gjithashtu, Meta e ftoi Rong për një vizitë në Shqipëri në kuadër edhe të forcimit të marrëdhënieve midis Shqipërisë dhe Kinës.

“Për mua ishte kënaqësi e veçantë që të takoja znj. Deng Rong dhe t’i dhuroja në shqip librin ‘Deng Xiaoping dhe Revolucioni Kulturor’ i shkruar prej saj edhe si vajza e këtij udhëheqësi të jashtëzakonshëm dhe reformator të Kinës që ne e shohim sot. Pata kënaqësinë e veçantë që gjithashtu ta ftojë për një vizitë në Shqipëri dhe mendoj që do të ishte një vizitë me shumë vlerë që do t’i shërbente forcimit të marrëdhënieve midis dy vendeve tona, midis Shqipërisë dhe Kinës”, – tha Kryetari i Kuvendit, Meta në një prononcim për median pas takimit.

Nga ana e saj, znj. Deng Rong, falënderoi Kryetarin Meta për takimin dhe shprehu kënaqësinë që libri i saj është botuar në gjuhën shqipe dhe është mirëpritur nga lexuesi shqiptar. Znj. Rong theksoi se Kina dhe Shqipëria janë popuj paqedashës e miqësorë dhe shprehu bindjen se vizita e z. Meta do të shërbejë në forcimin e miqësisë midis dy popujve tanë.

“Dua të shfrytëzojë këtë rast për të shprehur falënderimet më të sinqerta për vizitën e Kryetarit të Parlamentit të Shqipërisë dhe për kohën që ai ka gjetur për këtë takim, pavarësisht axhendës shumë e ngjeshur, e cila ka treguar patjetër edhe ndjenjat miqësore midis dy popujve tanë. Gjithashtu është kënaqësi dhe nderi im i jashtëzakonshëm për botimin e këtij libri në gjuhën shqipe dhe unë u gëzova jashtë mase që ky libër mirëpritet nga lexuesi shqiptar e që pasqyron miqësinë midis dy vendeve tona. Kina dhe Shqipëria janë popuj paqedashës dhe miqësorë dhe shpresoj që nëpërmjet vizitës së z. Meta këto shkëmbime të mund të forcohen në shërbim të miqësisë midis dy popujve tanë. Përsa i përket këtij libri, unë kam shumë dëshirë që në një kohë të përshtatshme, të mund të shkojë vetë në Shqipëri për të prezantuar këtë libër, gjithashtu dhe historinë dhe tregimet që përmbahen në të”, – deklaroi në prononcimin vajza e Deng Xiaoping-ut, Deng Rong.