Ministri Manjani bën bilancin e 1 viti pune, reforma në Drejtësi, ligji i pronave dhe statusi kandidat

Sot mbushet një vit nga dita kur Ministri i Drejtësisë u emërua Ylli Manjani

Në një takim me zyrtarë dhe mediat Manjani bën bilancin e punës 1-vjeçare.

Në fjalën e tij, Manjani e ka vënë theksin tek ligji për kthimin dhe kompensimin e ish-pronarëve, i cili sipas tij ka hyrë në rrugën e duhur dhe po jep rezultat.

“Nuk janë shumë, por 34 ish-pronarë kanë mbyllur dosjet njëherë e mirë me shtetin shqiptar dhe quhen të kompensuar. Aktualisht jemi në fazën e mbylljes përfundimtare të procedurave të identifikimit dhe ky proces do të vazhdojë me të njëjtin ritëm. Në dritën e Komisionit të Venecias, kjo çështje ka marrë zgjidhje përfundimtare”, tha Manjani.

Më tej, ministri i Drejtësisë ka shprehur bindjen se Komisioni Europian do të japë një rekomandim për nisjen e negociatave të anëtarësimit, duke qenë se klasa politike, sipas tij, i ka përmbushur detyrat.

“Pasi kemi realizuar reformën në drejtësi, presim që ky rekomandim të jetë pozitiv. Është me rëndësi që askush të mos bllokojë zbatimin e reformës në drejtësi”, ka vijuar Manjani.

Sa i takon shërbimeve gjyqësore dhe të prokurorisë, ai ka theksuar se, “ato janë vendime ku unë nuk mund të ndërhyj, pasi mund të interpretohet si presion mbi gjyqtarin”.

Manjani

Më lejoni të ndajë kënaqësinë që patën javën e shkuar që lidhet me opinionin e Komisionit të Venecias për çështjen e ligjit të trajtimit të pronave.

Në ditët e parë të punës sime kur jam njohur me atë ligj e kam mbështetur fuqimisht pasi në kushtet e Shqipërisë, kjo çështje meriton zgjidhje përfundimtare.

Mbetem përkrahës i pikëpamjes se pa një zgjidhje përfundimtare të menjëhershme të çështjes së pronave, nuk mund të kërkojmë dot mundësi për zhvillim ekonomik të qëndrueshëm dhe as për garanci juridike që në tërësi quhet klimë e biznesit. Pronari do të marrë atë që takon dhe prona në fund fare nuk është gjë tjetër vetëm se vlerë që qarkullon.

Ky ligj i realizon të gjitha këto kërkesa. Janë rreth 26 mijë syresh që sot i trajton Agjencia e Pronave. Të paktën në vitin e fundit është bërë një punë voluminoze. Megjithëse modeste, por duhet ta theksojmë, aktualisht 34 ish-pronarë kanë mbyllur dosjen një herë e mirë me të shkuarën dhe shtetin shqiptarë dhe ata quhen të mbyllur, të kompensuar.

Ligjërisht kemi rënë dakord që deri në 10 vitet e ardhshme kjo histori të mbyllet një herë e mirë duke vënë theksin tek kthimi fizik. Aty ku prona është e lirë, duhet t’i shkojë pronarit.

Për pak ditë shpresoj që edhe KE t’i japë mundësi Shqipërisë për celjen e negociatave, pritet një rekomandim pozitiv, pasi detyra kryesore ishte reforma në drejtësi.

Shqipëria i ka kryer detyrat dhe me shumë gjasa rekomandimi do të jepet nga KE për Shqipërinë.

Jetojmë në një moment kur edhe BE ka problemet e veta të brendshme.

Miratimi i ndryshimeve kushtetuese ishte përgjigja më e mirë për skeptikët. Shqipëria dhe garanci maksimale, që reforma, jo vetëm u bë, por tashmë është garanci themelore.

Nuk përjashtohen që mund të ketë pasur edhe gabime në ndryshimet kushtetuese, por e rëndësishme është që u miratua dhe të zbatohet.

Jam i bindur që do të marrim rekomandim pozitiv për celjen e negociatave, kushtet pastaj janë cështje tjetër.