Moti i keq, 4 aksidente për pak orë në Shkodër

Kushtet atmosferike kryesisht kanë shkaktuar 4 aksidente në Shkodër brenda një harku kohor të shkurtër. Tre prej këtyre aksidenteve kanë ndodhur në rrugën Shkodër-Velipojë dhe një tjetër në rrugën nacionale Shkodër-Tiranë. Aksidenti më i rëndë ka ndodhur në aksin Shkodër-Velipojë në afërsi të fshatit Trush teksa një mjet ka rënë në kanal në ujë. Brenda mjetit ndodheshin dy persona por sipas burimeve pranë spitalit rajonal ndodhen jashtë rrezikut për jetën. Është bërë e mundur që të nxjerrjen brenda një kohe të shpejtë. Në vendin e ngjarjes janë edhe zjarrfikëset duke bërë të mundur tashmë nxjerrjen e mjetit që ra në kanal.

Sipas policisë aksidenti ka ndodhur rreth orës 13:50 teksa automjeti tip ‘Wolsvagen’ me targë AA 437 OA ka dalë nga rruga dhe ka rënë në kanal. Policia bën me dije se aksidenti ka ardhur nga shkaqet atmosferike. Vetëm pak minuta më pas është shënuar edhe aksidenti i dytë vetëm pak kilometër më tutje. Në vendin e quajtur Ura ‘Gjo Lulit’ në rrugën Shkodër-Velipojë një mjet është përmbytur ndërsa brenda tij mendohet se kanë qenë sërish dy persona të cilët janë nxjerrë me shpejtësi dhe pas transportimit në spitalin rajonal të Shkodrës janë jashtë rrezikut për jetën. Edhe kjo makinë mendohet se është përmbysur si shkak i lagështirës në rrugë dhe reshjeve të dendura të shiut.

Për të mos mjaftuar në fshatin Sektor sërish në aksin Shkodër-Velipojë është shënuar aksidenti i tretë teksa një makinë ka dalë nga rruga dhe personat që ndodheshin në të kanë pësuar dëmtime të lehta duke qenë jashtë rrezikut për jetën. Pas Velipojës, edhe në aksin nacional Shkodër-Tiranë ka ndodhur një aksident në një kohë të afërt me 3 aksidentet e tjera. Dy mjete dyshohet se janë përplasur por nga kjo përplasje ka vetëm të lënduar dhe personat ndodhen jashtë rrezikut për jetën.

Në Shkodër vijon që të ketë reshje të dendura shiu që kanë nisur që një ditë më parë duke u bëra shkak edhe për këto aksidente, për fatin e mirë pa humbje jetësh në njerëz.