Nard Ndoka dhe Robert Aliaj sherr për kanabisin në emision

Deputeti dhe kryetari i PDK Nard Ndoka ka debatuar me artistin Robert Aliaj në emisionin ‘Dance With Me’ në tv Klan, të cilët replikuan për kultivimin e drogës në vend.

Në përfundim të performancës së kërcimit të Nard Ndokës dhe Greta Koçit, artisti Robert Aliaj i dhuroi deputetit një bluzë me lulen e kanabisit, duke shtuar se në fakt është një dhuratë për të gjithë deputetët që ta mbajnë sa herë që janë në Parlament.

Demokristiani i është kundërpërgjigjur duke i thënë se jo të gjithë deputetët janë të njollosur, pasi ka edhe politikanë me integritet.

Sipas Ndokës, janë vetëm dy njerëz të pushtetshëm që mund ta ndalin kultivimin e drogës në vend; Kryeministri Edi Rama dhe kryeparlamentari Ilir Meta.

“Të siguroj që më tepër se 80%  e deputetëve janë njerëz me moral të lartë politik, profesional. Janë dy persona që mund ta ndalojnë këtë fenomen, Kryeministri dhe kryetari i Parlamentit. Gishti të drejtohet tek ata që kanë faj, jo duke njollosur gjithë deputetët”, ishte përgjigjia e Nard Ndokës.