Natë golash në Champions, shkëlqejnë Mesi dhe Ozil

Ndeshjet e sotme në Ligën e Kampioneve kanë regjistruar një numër të madh golash, plot 28 të tillë, falë goleadave që kanë regjistruar ekipe si Barcelona, Bajern Mynih e Arsenal.

Bie më shumë në sy fitorja e thellë 4­0 e Barcelonës ndaj Mançester Sitit të Pep Guardiolës, me Lionel Mesin që ka masakruar skuadrën angleze.

Argjentinasi ishte protagonist me tre gola në këtë sfidë, duke çuar në 50 numrin e rrjetave të tundura në “Kamp Nou” në Ligën e Kampioneve, një rekord i ri për turneun. Ajo që bie në sy në këtë ndeshje është që të dy skuadrat e mbyllën takimin me 10 lojtarë, pas kartonëve të kuq të Bravo dhe Matië, ndërsa gjatë pjesës së parë për katalanasit u dëmtuan Zhordi Alba dhe Pike.

Në ndeshjen tjetër të grupit, Borusia Mynshenglabah mbajti gjallë shanset për kualifikimin e mëtejshëm me një fitore në fushën e Sëlltikut. Fitorja më e thellë e natës i përket Arsenalit, ku Mesut Ozil u bë lojtari i 5­të në historinë e “topçinjve” që regjistron një tregolësh në Ligën e Kampioneve në suksesin 6­0 ndaj Ludogorets.

Kjo ishte fitorja e 100 në arenën ndërkombëtare për Arsen Venger. Arsenali ka 7 pikë, po aq sa PSG që mundi lehtësisht Bazelin e Xhakës me rezultatin 3­0, duke përcaktuar kësisoj edhe hegjemoninë në Grupin A të turneut.

Një grup shumë i veçantë duket ai B, ku Napoli u mund në shtëpi nga Beshiktashi me shifrat 2­3 në një sfidë ku Insinje humbi penallti dhe të cilën Elseid Hysaj e ndoqi nga stoli i rezervave.

Skuadra italiane vazhdon të kryesojë grupin por fitorja e Benfikës në fushën e Dinamos së Kievit shton konkurrencën për kualifikimin e mëtejshëm.

Në Grupin D, Atletiko e Madridit vazhdoi serinë e fitoreve 1­0 në këtë turne, duke regjistruar të tretën radhazi ndaj Rostov për të kryesuar grupin me pikë të plota.

Skuadra e Simeones ndiqet nga Bajerni që mundi 4­1 PSV­në duke shlyer gabimin e bërë në ndeshjen e kaluar përballë spanjollëve.