Në kërkim burrë e grua në Shkodër, iu gjetën 37 kg kanabis në banesë

SHKODËR- Burrë e grua janë shpallur në kërkim nga Policia e Shkodrës pasi në banesën e tyre janë gjetur 37 kg kanabis.

Ditën e djeshme nga sektori për hetimin e narkotikëve dhe trafiqeve në Drejtorinë Vendore të Policisë Shkodër në bazë të informacioneve të siguruara në rrugë operative dhe në vijim të punës së pandërprerë për parandalimin e prodhimit të lëndëve narkotike, në lagjen “Skënderbeg” Shkodër është finalizuar me sukses operacioni i radhës i koduar “DRYING”.

Si rezultat i këtij operacioni u shpallën në kërkim dhe po punohet për kapjen e shtetasve:
– M.K., 25 vjeç, banues në Shkodër.
– F.Gj., 23 vjeçe banuese në Shkodër.

Gjatë kontrollit të ushtruar në banesën ku banonin shtetasit e mësipërm (bashkëshortë) u gjet dhe u sekuestrua në cilësinë e provës materiale 37 kg lëndë e dyshuar narkotike cannabis sattiva.

Materialet proçeduriale iu referuan Prokurorisë së Rrethit Gjyqësor Shkodër për veprën penale “Prodhimi dhe shitja e narkotikëve” në bashkëpunim.