Nga Vaduzi në Shkodër, ja axhenda e Kombëtares

Sot nuk do të jetë ditë pushimi për kuqezinjtë. Trajneri Xhani De Biazi ka programuar që në mesditë të zhvillohet një seancë e lehtë stërvitore. Rreth orës 12:00 pritet që Kombëtarja të zhvillojë një seancë stërvitore, ku si gjithmonë ngarkesën më të lartë do ta marrin ata futbollistë që nuk kanë pasur minuta gjatë ndeshjes së djeshme.

Më pas, do të konsumohet dreka dhe lojtarët do të pushojnë për pak orë. Në orën 18:30 është programuar nisja nga Vaduzi për të udhëtuar drejt Shqipërisë. Çarteri me kuqezinjtë do të mbërrijë për disa orë në Tiranë, nga ku kuqezinjtë do të konsumojnë një darkë pranë zonës së Aeroportit të Rinasit e për t’iu drejtuar menjëherë Shkodrës.

Trajneri ka zgjedhur një axhendë të tillë për ditën e sotme, në mënyrën që e shtuna ta gjejë skuadrën në qytetin ku edhe do të zhvillohet takimi.