Ngjarja në 9-vjeçaren e Paskuqanit, Nikolla: Në shkollë u hodh gaz

Shtatë nxënës të shkollës 9-vjeçare “Jashar Hoxha”në Paskuqan kanë shfaqur probleme shëndetësore në klasë, gjatë paradites së sotme dhe janë dërguar me urgjencë në spital.
Burime për “BalkanWeb” bëjnë të ditur se nxënësit e klasës së shtatë janë ndjerë keq, sapo kanë hyrë në shkollë, pasi pastruesja kishte përdorur acid për larjen e ambienteve të klasave.

Mësohet se pasi morën ndihmën e nevojshme në pavionin e Pediatrisë në QSUT, nxënësit u dërguan në shtëpi dhe janë në gjendje të mirë.

Ndërkohë, burime nga QSUT nuk përjashtojnë mundësinë që nxënësit të jenë helmuar nga ushqimi, pasi kanë deklaruar se para se të ndiheshin keq kishin konsumuar patatina.

Të tjera versione për ngjarjen në shkollën e Paskuqanit kanë dhënë në parlament deputetë të opozitës dhe ministrja e Arsimit Lindita Nikolla.

Deputeti i PD-së Asllan Dogjani tha se nxënësit kanë përfunduar në spital pasi janë droguar, ndërsa ministrja Nikolla deklaroi se fëmijët janë ndjerë keq pasi në shkollë është hedhur gaz.