Një djalë në Korçë kapet duke vjedhur në dy mjete njëkohësisht

Një djalë i ri në Korçë, kapet duke vjedhur në dy mjete njëkohësisht.

Një kalimtar i rastit i cili pa skenën telefonoi policinë në numrin 129, duke çuar në arrestimin e 19- vjeçarit Anxhelino Llapanji, banues në fshatin Drithas, i dënuar më parë për vjedhje.

Në telefonatën e bërë në polici mbrëmjen e djeshme, një qytetar tha se në lagjen nr.10, rruga “Pano Xhamballa” në Korçë, një person po kryente lëvizje të dyshimta.

Efektivët e policisë mbërritën në vendin e ngjarjes dhe konstatuan 19- vjeçarin duke vjedhur vegla të ndryshme pune, në automjetin tip “Suzuki” pronë e shtetasit M.I.

Llapanji sendet e vjedhura, po mundohej t`i transportonte duke vjedhur një mjet tjetër tip triçikël, në pronësi të shtetasit F.G., të parkuar në rrugë.

Në ngarkim të tij materialet i kaluan Prokurorisë së Korçës për ndjekje të mëtejshme për veprën penale “Vjedhje”, ndërkohë që vijojnë hetimet për zbulimin e rasteve të tjera ku mund të jetë përfshirë.