Njerëzit nuk do të jetojnë kurrë më shumë se 125 vjet

Kufizimi natyror për jetëgjatësinë e njeriut nuk është më shumë se 125 vjet, ka gjetur një studim.

Pavarësisht se çdo vit po thyhet rekordi i njeriut që ka jetuar më së gjati, pika finale e ‘ndaljes’ ka mbetur pothuajse e njëjtë.

Asnjë njeri nuk ka jetuar më shumë se 122 vjet – moshë kjo e arritur nga francezja Jeanne Calment më 1997, transmeton Gazeta Express.

Hulumtuesit besojnë se kjo është për shkak se ekziston një limit natyror i moshës të cilin njerëzit nuk mund ta kalojnë asnjëherë.

Hulumtuesit e udhëhequr nga Jan Vijg nga Kolegji i Mjekësisë “Albert Einstein” në Nju Jork, hulumtuan nëse maksimumi i jetëgjatësisë njerëzore është 122 vjet.

Argumenti më bindës se maksimumi i jetëgjatësisë njerëzore nuk është i rregulluar është fakti se në shumicën e vendeve po ka rritje të jetëgjatësisë në shekullin e fundit, thanë hulumtuesit.

Megjithatë, një pjesë e madhe e rritjes së jetëgjatësisë vjen nga një reduktim i madh i vdekjeve në lindje dhe foshnjëri. Nëse nuk do të kishte limit, ne do të shihnim një numër më të madh të njerëzve të moshuar se kurrë më parë.

Për ta testuar teorinë, ata studiuan Databazën Ndërkombëtare të Jetëgjatësisë, që mban regjistrime të moshës së vdekjes të njerëzve nga 41 vende mes 1968 dhe 2006.

Ata gjetën se njerëzit vazhdonin të jetonin më gjatë – por vetëm deri tek një pikë. Kështu, hulumtuesit thanë se njerëzit nuk do të jetojnë kurrë më shumë se 125 vjet, pasi që trupi nuk mund ta kalojë në mënyrë natyrore jetëgjatësinë e caktuar të jetës.