Nuk donte që nusja e vëllait të vinte në shtëpi, rreh nënën

Një i ri në Fier ka përfunduar në pranga, pas dhunës së ushtruar ndaj nënës së tij.

Elton Gjeçi, 30 vjeç, banues në fshatin Havaleas, u prangos ditën e djeshme pas denoncimit të bërë nga e ëma, G.Gjeçi 65 vjeçe.

Gruaja tha në polici se i biri e ka rrahur, duke i shkaktuar lëndime trupore. E moshuara tha para uniformave blu se në mënyrë të vazhdueshme kishte debate me të birin, por ditën e djeshme situata ka përfunduar në dhunë.

Burime nga policia i thanë Noa.al, se gjithçka ka ndodhur pasi 30- vjeçari nuk donte që nusja e të vëllait të vinte në shtëpinë e tyre.

Vëllai i Eltonit ishte i martuar dhe jetonte pranë banesës ku i arrestuari jetonte me prindërit, por i riu nuk e pëlqente nusen e tij, duke bërë debate me të ëmën, të cilës i kërkonte me insistim, të mos e fuste në banesë.

Por nëna mësohet t’i ketë thënë se e kishte nusen e djalit dhe nuk e nxirrte dot, por i riu i është kthyer kundër dhe asaj, duke e dhunuar.

Në këto kushte e moshuara e denoncoi duke bërë që të arrestohet për veprën penale “Dhunë në familje”. Lidhur me këtë ngjarje vijojnë ende hetimet me synim zbardhjen e detajeve të mëtejshme.