Parashikimi i mediave angleze: “Simeone do të vijë në Angli, sepse pëlqen të përballet me më të mirët?

Kontrata e Diego Pablo Simeone-s me Atletico Madrid do të skadojë në 2018-ën. Ka shumë mundësi që argjentinasi të lirohet më herët, domethënë në përfundim të këtij sezoni. Chelsea ka provuar ta bindë vitin e kaluar, para se të kthente sytë nga Conte. Inter, dihet, mendon prej kohësh për trajnerin argjentinas, emri i të cilit përflitet për një kalim te ziklatrit sa herë që trajneri i milanezëve vihet në diskutim.

Zëra që shtohen, me pak fjalë. Edhe pse për momentin është e sigurt se Simeone është akoma shumë i lidhur me klubin madrilen. Por merkato nuk ndalet kurrë kur je një nga më të mirët dhe kjo është konfirmuar edhe nga faqja e parë e “The Mirror” që ka shkruar për tundimin e ri të Simeone-s: të sfidohet me Guardiola, Klopp dhe Mourinho: “Në 2018-ën, por ndoshta edhe më parë, – është shkruar në të përditshmen angleze, – ai ka dëshirë të vijë në Premier për t’u përballur me trajnerët më të mirë në qarkullim”.

Ku apo te cili stol, nuk sqarohet. Zërat flasin për atë të Chelsea-it, nëse Antonio Conte, një tjetër trajner i madh, do të dështojë në drejtim të “Blues”.