PD çon Vettingun në Kushtetuese, por ja çfarë përgjigje merr nga ambasada e SHBA

Partia Demokratike ka depozituar sot në Gjykatën Kushtetuese ankimimin e saj për Ligjin e Vetingut. Pas dorëzimit, në një deklaratë për mediat, deputeti demokrat Oerd Bylykbashi akuzoi Ramën se synon që kontrollin e gjyqtarëve që do të hetojnë atë, ta bëjnë zyrtarët e lartë të PS, me të cilën opozita sigurisht nuk mund të jetë dakord.

Ambasada e Shteteve të Bashkuara të Amerikës në Tiranë, e pyetur nga “Panorama Online” lidhur me dërgimin nga Partia Demokratike të ligjit për rivlerësimin e gjyqtarëve të prokurorëve në Gjykatën Kushtetuese, jep këtë përgjigje:

“Në përgjigje të pyetjes suaj, ambasada e SHBA ju sjell në vemendje deklaratën e datës 23 shtator të ambasadorit Lu”.

Donald Lu

“Panorama” sjell edhe një herë në kujtesë reagimin e ambasadës së SHBA të datës 23 Shtator.

Aty shkruhej: “Është e drejta kushtetuese e opozitës ta ankimojë ligjin e vetting në Gjykatën Kushtetuese apo të bojkotojë mbledhjet e mëtejshme të komisionit të posaçëm për reformën në drejtësi.

I kemi thënë udhëheqjes së Partisë Demokratike se rrezikojnë të bëhen ajo parti që populli shqiptar beson se është kundër kësaj reforme dhe se po mbron gjyqtarët dhe prokurorët e korruptuar, ose gjyqtarë e prokurorë tek të cilët kanë ndikim politik.

Kujtoj deklaratën e bërë nga Presidenti Nishani, i cili tha në një intervistë se edhe pse nuk i pëlqen disa nga nenet e Ligjit të Vetting, as ai dhe as ekspertët e tij ligjorë nuk mund të gjejnë diçka jokushtuetuese në ligj. Ne, Shtetet e Bashkuara, iu bëjmë thirrje të gjitha partive politike në Shqipëri të vazhdojnë të kërkojnë zbatimin e plotë dhe të shpejtë të reformës në drejtësi”.