PD, Grida Duma: Censura e Ramës dhe Veliajt rritet, rritet dhe revolta e qytetarëve

Partia Demokratike ka akuzuar sërish kryebashkiakun Erion Veliaj për censurë mediatike, por këtë herë duke përfshirë edhe kryeministrin Edi Rama. Me anë të një deklarate për median, sekretarja për Marrëdhëniet me Publikun në PD, Grida Duma, tha se shumica e mediave një ditë më parë nuk e transmetoi denoncimin nga selia blu.

Deklarata e plotë e Grida Dumës:

Erjon Veliaj, jo vetëm mbylli një program televiziv që kishte investiguar rreth aferës së tij korruptive e kriminale në Sharrë, por ai nuk lejoi dje as transmetimin e denoncimit të Partisë Demokratike në lidhje me këtë skandal të rëndë të cënimit të lirisë së medias, të lirisë së fjalës.

Denoncimi ynë dje nuk u dha nga pjesa më e madhe e medias, që gjendet nën kontrollin e rreptë të pushtetit.

Nën kontrollin e Edi Ramës dhe dorës së tij të zgjatur në tërë aferat korruptive e kriminale të Bashkisë së Tiranës, që është Erjon Veliaj.

Ky mashtrues i pafytyre që fshihet pas pamjeve me bicikletë e me tuta po bën gjithçka që të fshehë të vërtetën për vdekjen e një 17 vjecari në landfillin e tij, duke i mbyllur gojën medias, dhe duke kërkuar ti heqë zërin edhe opozitës së vendit.

Kjo censura e dyfishtë edhe pse dëshmon se kush janë në të vërtetë Erjon Veliaj dhe Edi Rama, është një turp për vendin, për shoqërinë dhe mediat tona.

Po i drejtohemi sot mediave të vendit me mesazhin që të mos bëjë kompromis me këto ngjarje të rënda, të mos pranojë harresën që kërkon të vendosë Veliaj mbi vdekjen e një 17 vjeçari të pafajshëm.

Ne e dimë se jeni në kushtet e presionit, kërcënimit dhe joshjes, por është në nderin tuaj të ruani lirinë e shprehjes, arsyeja kryesore për ekzistencën e medias.

Partia Demokratike nuk do të heqë dorë asnjë ditë nga denoncimi i aferave korruptive e kriminale si ajo e Sharrës, e aq më tepër nga denoncimi i presionit ndaj medias.

Pika e vlimit po afron.

Edi Rama dhe Erion Veliaj mund të errësojnë ekrane e pushojnë gazetarë, por nuk do ta ndalin revoltën e popullit që po rritet përditë kundër sundimit të tyre të korruptuar e kriminal.