BE: Për Trepçën vendos Kosova nëse futet në dialogun e Brukselit

Komisioni Evropian “është në dijeni” për pozicionin e marrë nga Qeveria e Serbisë lidhur me miratimin nga Kuvendi i Kosovës të ligjit për “Trepçën”, ka deklaruar zëdhënësja e Komisionit, Maja Kocijançiç.

Ajo, me rastin e vendimit të Qeverisë së Serbisë “për anulimin e të gjitha pasojave ligjore” të institucioneve të Kosovës për Trepçën, ka përsëritur qëndrimin e së hënës nga selia e Komisionit Evropian në Bruksel, transmeton lajmi.net.

“Ne jemi në dijeni me faktin se Kuvendi i Kosovës e ka miratuar ligjin për Trepçën. Gjithashtu jemi të njohur edhe me faktin dhe pozicionin e Qeverisë së Serbisë për këtë”, ka thënë Kocijançiç për Tanjug, transmeton zëri.net

Sikur edhe dje, Kocijançiç edhe sot ka thënë se nëse Kosova (Prishtina) nuk pranon që kjo temë të jetë në tryezën e dialogut në Bruksel, atëherë BE-ja e vetme dhe vetëm me pëlqimin e Serbisë (Beogradit) nuk mund ta bëjë një gjë të tillë.

Kryeministri i Serbisë, Aleksandar Vuçiç ka njoftuar për vendimin e Qeverisë së Serbisë lidhur me Trepçën, por se kjo nuk është marrë parasysh nga zyrtarët qeveritarë të Kosovës.