Percahet Koalicioni PS- LSI ,Tahiri e Kodheli kundër ministrit të LSI-së, Ylli Manjani

Propozimi i ministrit të Drejtësisë, Ylli Manjani që ushtria të përfshihet në aksionet anti-kanabis ka gjetur kundërshtime nga ministri i Brendshëm, Saimir Tahiri dhe ministrja e Mbrojtjes, Mimi Kodheli.

Të dy e kanë cilësuar situatën jo alarmante dhe jo një emergjencë kombëtare. Sipas tyre situata është normale, e siç tha ministrja Kodheli emergjencën kombëtare e përcakton qeveria e jo një ministër.

Gjatë një konference për median ministri Saimir Tahiri tha se propozimi i Manjanit nuk është i saktë dhe se kanabisit nuk ka një alarm kombëtar.

“I pasaktë propozimi i Manjanit që ushtria të ndërhyjë në aksionet kundër kanabisit”. Tahiri vuri në dukje se vendi nuk është në kushtet e një alarmi kombëtar.

“Nuk jemi në kushtet e një alarmi kombëtar, por përballë një fenomeni që duhet ta adresojmë me çdo qytetar në vend që ka menduar se varfërinë mund ta vrasë duke mbjellë kanabis. E mirëkuptoj, por nuk e përkrah.

“E mirëkuptoj vullnetin për të bërë propozim që shkon në adresimin e këtij fenomeni, besoj është propozim i pasaktë, por hyn tek propozimet e dëshirës së mirë. Puna jonë nuk bëhet për konferencat e shtypit, por duke marrë masat e nevojshme të cilat mund të sjellin efekt të menjëhershëm për parandalimin e fenomenit. Ndryshimi i Kodit Penal është një prej masave që do sjellë rezultate”.

I të njëjtit mendim me Tahirin është dhe Kodheli e cila po ditën e sotme u shpreh se: “Forcat e Armatosura janë serioze dhe të flasim për gjëra serioze”. Kodheli dha këtë përgjigje pas interesit të medias mbi propozimin e Manjanit.