Përplasen tre makina në aksin Korçë-Pogradec, plagosen 3 persona

KORCE – Tre persona janë plagosur rëndë mëngjesin e sotëm, si pasojë e një aksidenti automobilistik, në aksin rrugor Korçë-Pogradec.

Burime zyrtare nga policia bëjnë të ditur se tre makina janë përplasur me njëra-tjetrën, në fshatin Petrushë në Pogradec dhe për pasojë janë plagosur tre persona, të identifikuar si: Behar Kastrioti, Rafet Capollari dhe Redi Rustemlli.

Mësohet se të plagosurit janë dërguar menjëherë në spital, prej ku mësohet se janë në gjendje të rëndë.

Policia bën të ditur se makinat e përfshira në aksident janë një “Ford”, me targa AA 605 EF, një “Volkswagen” me targa AA 451 LV, dhe një makinë “Mercedes- Benz”, me targa AA 462 HV.

Ndërkohë, policia ka mbërritur në vendin e ngjarjes dhe po punon për të zbardhur shkaqet e aksidentit. Paraprakisht dyshohet se makinat kanë rrëshqitur për shkak të lagështirës në rrugë.