Plas në Qeveri/ Kodheli injoron Manjanin për hashashin: Për Ushtrinë duhet folur seriozisht

Ministri i Drejtësisë, Ylli Manjani një ditë më parë propozoi që për zgjidhjen e problemit të kanabisit të ndërhyjë dhe ushtria. Madje ministri i LSI-së tha se për këtë mund të krijohen dhe “forcat policore të xhandarmërisë”.

Por, ministrja e Mbrojtjes Mimi Kodheli e ka ‘injoruar’ një propozim të tillë duke theksuar se kur flitet për Forcat e Armatosura diskutohet seriozisht. Përveç mos përfilljes së Manjanit, Kodheli indirekt bëri përgjegjës për fenomenin e kanabisit ministri e Brendshëm, Saimir Tahiri dukë thënë se, në demokraci detyrat janë të ndara.

“Siguria është diçka serioze. Edhe Forcat e Armatosura janë një gjë serioze dhe kur flitet për FA dhe për gjërat serioze që ata bëjnë duhet të flitet seriozisht. Gjërat serioze kanë të bëjnë me sigurinë e vendit. Punët në demokraci janë të ndara. Gjithkush bën punën që i takon”, u shpreh Kodheli.