Plehrat, Nishani: Nuk do zhgënjej asnjëherë interesin e qytetarëve

“Çështjen dhe kauzën tuaj, për të cilën duhet të vazhdoni të këmbëngulni, po e trajtoj me shumë seriozitet ligjor, institucional dhe personal, jo vetëm në cilësinë e Kreut të Shtetit, por edhe si një qytetar shqiptar dhe si prind. Ju garantoj se përsa kohë do të jem në këtë Zyrë, nuk do ta zhgënjej asnjëherë interesin publik të qytetarëve!”.

Ishte kjo deklarata e presidentit Bujar Nishani, gjatë një takimi me aktivistë të shoqërisë civile, përfaqësues të Aleancës Kundër Importit të Plehrave si dhe ekspertë ligjorë e mjedisorë.

Takimi u zhvillua në Presidencë mbi Ligjin e Menaxhimit të Integruar të Mbetjeve. Gjatë takimit, kreut të Shtetit iu kërkua të mos dekretojë ligjin e mbetjeve, pasi sipas tyre nuk është në shërbim të qytetarëve.