A po themelon Rama partitë e reja opozitare?

Nga Flavio Qarri

Sot Gjergji Bojaxhiu “zyrtarizoi” lëvizjen e tij politike! Në fakt ka kohë që është zyrtare por vetëm kohët e fundit u gjet momenti i përshtatshëm për të mbuluar fekalet me bojë. Nëse doni të shikoni trajektoren politike të Edi Ramës, mjaft të ndiqni edicionin e lajmeve të Top Channel.

Gjergji ishte menaxheri dhe “ylli” i ri politik që iu largua të djathtës. Gjatë zgjedhjeve për Tiranën ai arriti të merrte një numër të mirë votash. Sigurisht asnjëra nuk ishte e majtë. Vetëm gri dhe e djathtë. Më pas u duk se ai do të ngjitej e strukturohej pambarimisht. Personalisht isha shpresëplotë për të. Madje asokohe edhe mund ta mbështesja. Por kur zbulon se gruaja të tradhëton nuk është se mund të flesh me të sikur nuk ka ndodhur gjë apo jo?! Çështja është shumë e thjeshtë!

Për sa kohë që Bojaxhiu grryente vota dhe inskenonte një farë opozite të kontrolluar, aksesi mediatik ishte i plotë, puna e partisë nuk bojkotohej e as pengohej. Në të vetmen ditë që Bojaxhiu i doli piktorit përballë, krejt pa pritur karriera e tij politike mori fund. Si? Top Channel publikoi provat dhe aferën dhe pasurinë marramendëse që ai kishte krijuar ndërkohë që ishte zv. ministri që firmoste për “Petroliferën”. Pra, ai në kurriz të shqiptarëve, u bë miliarder, shkatërroi një pasuri si Pylli i Sotës dhe po na e shiste veten si e ardhmja e pastër.

Për sa kohë I leverdiste Ramës, ai ishte alternative e re nga e djathta, ditën që ai shkeli te Hotel Tirana për të kundërshtuar piktorin, bojaxhiun e hodhën nga shkallët. I njëjti skenar përsëritet me Blushin.

I vetmi ndryshim është që Blushi gëzon foltoren e Parlamentit. Grupimet e reja që shfaqen rastësisht para zgjedhjeve kanë përgjithësisht të njëjtin fund të hidhur. Shkojnë te thesi I madh I atij që ka pushtetin. Për një arsye të thjeshtë. Piktori përdor bojaxhinjtë e rinj e të vjetër për të rifreskuar fasadën e shpëlarë të ngrehinës neodiktatoriale. E provoj shpesh në kurrizin tim se çfarë do të thotë të bësh opozitë në Shqipëri. Në mediat tona nuk ngurojnë të nxjerrin as emrin e ndonjë hallexhiu që ka kaluar me të kuqe, por kur ti proteston kundër Ramës e kur të arrestojnë, mediat e kontrolluara, sillen sikur nuk ka ndodhur kurrë.

Doni një rast? Goditja me vezë ndaj ministrit të shëndetësisë në janar. Ndaj ftoj Blushin, Bojaxhiun dhe këdo tjetër që i ofrohet publikut si I ri, të bëjë diçka të re, se këtë filmin tuaj e kemi parë edhe me ritransmetim. Politika nuk zhvillohet vetëm nëpërmjet deklaratave por mbi të gjitha në struktura.

E kur sheh individët e përfshirë në këto lëvizje të reja, kupton që janë të njejtët njerëz që e majta i delegon për të mbledhur votat e të pakënaqurve e për t’i rikthyer në vathën e vet. Edi Rama tashmë po aplikon strategjinë që përdori me Mjaft-in edhe në skakierën politike. Krijo një grup që inskenon opozitën, investo dhe përfito.