Policia sqaron çfarë ndodhi me Ferrarin me targa të huaja

Policia e Tiranës ka sqaruar përmes një komunikate situatën e një mjeti “Ferrari”, me targa të huaja që ishte bërë objekt diskutimi në mediat sociale për shkak të një gjobe. Burimet zyrtare sqarojnë se gjoba është vendosur sot për këtë mjet që kishte parkuar në kundërshtim me rregullat e qarkullimit rrugor.

NJOFTIMI I POLICISE:

Policia Rrugore e Tiranës ka ndëshkuar me gjobë mjetin tip “Ferrari”, me targa të huaja, që kishte parkuar një ditë më parë në vend ndalim-qëndrimi.

Shërbimet policore konstatuan dhe ndëshkuan mjetin sot në orët e pasdites. Në bazë të legjislacionit mjeti u gjobit maksimalisht për parkim të gabuar, me 3 mijë lekë.

Policia Rrugore sqaron opinion, nisur nga publikimet në disa media online, se mjeti nuk u ndëshkua me gjobë një ditë më parë, pasi nuk u konstatua drejtuesi i tij dhe në kushtet kur mjeti është me targa të huaja, nuk vendoset gjobë në mungesë.

Policia ka thirrur shërbimet e karoatrecit për të dërguar mjetin në pikën e bllokimit, por për shkak të specifikave teknike të makinës (ishte shumë e ulët) nuk u realizua zhvendosja e saj.

Policia Rrugore thekson dhe garanton se pavarësisht disa komenteve në mediat online, çdo shkelje është e ndëshkueshme me forcën e ligjit.

Ndaj i ftojmë mediat që të punojmë bashkë për një Shqipëri më të sigurt!