Pranga magazinierit e rojës së Rezervave të Shtetit, shiti motorin e sekuestruar

Bie në pranga magazinieri i rezervave të shtetit dhe roja i këtij objekti. Arrestimet janë bërë pas denoncimit të bërë në emisionin “Stop”, ku një person shkoi dhe mori një motor kundrejt një shpërblimi.

Policia e Tiranës në bashkëpunim me Task Forcën e Prokurorisë së Tiranës kanë vënë në pranga Ervis Lako, 32 vjeç, banues në Tiranë, me detyrë magazinier në Drejtorinë Rajonale të Rezervave Materiale të Shtetit dhe Arben Topçiu, 48 vjeç, banues në Tiranë, me detyrë roje në Drejtorinë Rajonale të Rezervave Materiale të Shtetit, Tiranë.

Nga hetimet e kryera ka rezultuar se, shtetasi Ervis Lako, gjatë ushtrimit të detyrës së tij si magazinier në Drejtorinë Rajonale të Rezervave Materiale të Shtetit Tiranë, i ka kërkuar dhe marrë shumën prej 10.000 lekë të reja një personi, për ti shitur një motor Vespa, që ndodhej i sekuestruar në Drejtorinë Rajonale të Rezervave Materiale të Shtetit Tiranë.

Për realizimin e kësaj vepre penale, ka bashkëpunuar edhe me rojën e kësaj drejtorie, Arben Topçiu, i cili ka lejuar daljen e motorit pa dokumentacionin përkatës dhe pa e regjistruar në regjistrin përkatës.

Materialet procedurale iu kaluan Prokurorisë pranë së Tiranës, për veprat penale të “Korrupsionit pasiv të personave që ushtrojnë funksione publike” dhe “Shpërdorimit të detyrës”.