Presidenti Nishani vizitë zyrtare në Jordani

Presidenti i Republikës Bujar Nishani dhe Zonja e Parë, Odeta Nishani, u pritën me nderime në pallatin mbretëror të Mbretit të Jordanisë Abudllah II Ibn Al Hussein.

Pas ceremonisë shtetërore, Presidenti Nishani zhvilloi një takim të veçantë kokë më kokë me Madhërinë e Tij.

Më pas, krerët e të dy vendeve kryesuan takimin e zgjeruar mes dy delegacioneve. Presidenti shqiptar theksoi në fillim vullnetin e përbashkët për të intensifikuar marrëdhëniet politike mes dy vendeve në vitet e fundit. Megjithatë kreu i shtetit vlerësoi se bashkëpunimi ekonomik e tregtar nuk i përgjigjet nivelit aktual të bashkëpunimit politik, duke shprehur bindjen se nga institucionet e të dy vendeve do të bëhet më shumë për të përmirësuar kuadrin e përbashkët ligjor, që do të inkurajonte më shumë investime.

Turizmi, energjia, bujqësia, arsimit dhe shkenca ishin fushat ku krerët e shteteve ranë dakord të nxisin strukturat qeveritare, dhe ato parlamentare për të eksploruar mundësitë e bashkëpunimit me ide e projekte konkrete. Nishani vlerësoi mbështetjen e Jordanisë për rajonin e Ballkanit dhe Kosovën, ndërsa theksoi rolin e treguar nga Jordania në luftën ndaj terrorizmit dhe ekstremizimit të dhunshëm.

Presidenti Nishani u takua edhe me Kryeministrin e vendit Hani Al Mulki, ku u vlerësuan iniciativat e bashkëpunimit mes dy vendeve.

Ndërsa në takimin me Presidentin e ri të Senatit të jordanisë, Feisal Al Fayez, Nishani tha se tani janë të gjitha mundësitë që marrëdhëniet parlamentare të forcohen.

Tv Klan