Problemi i ekipit të Spanjës, në momentet e para në Shqipëri

Nuk ka shkuar fare pa probleme udhëtimi i kombëtares së Spanjës nga Torino drejt Tiranës mbrëmjen e sotme.
Kundërshtari i Shqipërisë në duelin e së dielës mbërriti rreth orës 19:45, me disa minuta vonesë nga sa ishte parashikuar.

Shkak është bërë stuhia që përfshiu vendin tonë në orët e mbrëmjes, e cila detyroi pilotët të bënin disa xhiro në ajër para se ta ulnin avionin në aeroportin “Nënë Tereza”.

Fatmirësisht gjithçka kaloi pa pasoja, shkruan “Panorama Sport”.

Në fakt spanjollët e prekën të parët tokën shqiptare, por në udhëtimin drejt Shkodrës autobusit të tyre iu desh të ndiqte atë me mbishkrimin “Ti Shqipëri më jep nder” të Kombëtares sonë.

Pra garën drejt Shkodrës e fituan kuqezinjtë; të shpresojmë që të njëjtin rezultat të ketë edhe ajo e së dielës mbrëma në “Loro Boriçi”.