Pronari i argjendarisë së grabitur: Falimentova, por shyqyr që jam gjallë! Pronari i argjendarisë së grabitur: Falimentova, por shyqyr që jam gjallë!

Pronari i argjendarisë së grabitur në Tiranë mbrëmjen e djeshme ka thënë se, tashmë, ai ka falimentuar:

“Janë marrë rreth 250 ora, 25 kilogramë argjend dhe 8 kilogramë flori. Është mundi dhe djersa familjes sime për 25 vite. Unë falimentova por them shyqyr që kam jetën, sepse miqtë e mi kanë humbur edhe jetën nga kjo punë. Kam bërë ç’është e mund për të mbrojtur sigurinë e saj. Është vjedhur komplet serveri dhe kamera brenda. Firma e sigurimit privat nuk e ka çuar deri ne fund hetimin, ata nuk më kanë njoftuar për rënies së alarmit”.

“Nuk është bërë vjedhje nga vitrina ballore por nga ana e objektit. Vjedhja është spektakolare, mafioze e organizuar dhe sofistikuar. Ka një organizim perfekt nga mënyra se si janë marrë gjërat. Ata janë njohës të mirë të vjedhjes së floririt. Janë gjetur çelësat e kasafortës që ishin të fshehur shumë mirë”, tha pronari Pavlo Shkarpa për Report Tv.

“Është hera e dytë që vidhem brenda 3 muajsh. Tani nuk jam i siguruar pasi jam në gjyq për vjedhjen e parë duke qenë se nuk e kam parë sigurimin.

Godina që po restaurohet është monument kulture dhe prokuroria duhet të hetojë lejen e ndërtimit të saj. Ajo u dha fillimisht dhe më pas u pezullua. Godina është tërësisht e hapur dhe mund të futet kushdo. Janë hapur tre mure deri sa kanë hyrë tek argjendaria ime. Kanë bllokuar serverin e kanë mbyllur të gjitha kamerat”, ka thënë ai.