Qeveria përzë FMN-në. Ahmetaj deklaron se nuk do të ketë rinovim marrëveshje

Në prag të zgjedhjeve të përgjithshme, që mbahen vitin e ardhshëm, qeveria do të largojë Fondin Monetar Ndërkombëtar nga Shqipëria. Ministri i Financave Arben Ahmetaj deklaroi në Top Channel se marrëveshja aktuale me Fondin nuk do të rinovohet, por qeveria do të kërkojë një marrëdhënie të re, ku FMN të ketë vetëm rol këshillues.

“Nuk do të ketë një marrëveshje të re detyruese apo kushtëzuese. Do të preferonim të kishim një marrëveshje të bazuar thjesht një monitorim dhe këshillim,” deklaroi ministri i Financave.

Largimi i FMN duket i lidhur drejtëpërdrejtë me zgjedhjet. Qeveria do që të ketë dorë të lirë vitin e ardhshëm për të shpenzuar më shumë dhe marrë më tepër borxh, çka nën marrëdhënien aktuale me Fondin Monetar Ndërkombëtar nuk do ishte e mundur.

Rritje pagash

Syri.net pati parlajmëruar se marrëdhëniet e qeverisë me Fondin Monetar ishin acaruar dhe se marrëveshja mes palëve ishte vënë seriozisht në rrezik. (https://www.syri.net/ekonomi/3009/ekskluzive-qeveria-perplaset-me-fmn-rrezikohet-marreveshja-shkak-deficiti-buxhetor-i-2017-es/)

Konfirmimi zyrtar nga Arben Ahmetaj, paralajmëron se marrëdhëniet mes qeverisë dhe Fondit Monetar janë tashmë të tendosura. Shkak është bërë deficiti buxhetor që qeveria ka programuar për buxhetin e vitit të ardhshëm.

Në programin trevjeçar të nënshkruar në vitin 2014, qeveria dhe FMN kishin rëndë dakord që për vitin e ardhshëm buxheti të mbyllej me një suficit primar sa 0.9 për qind e Prodhimit Kombëtar.

Por qeveria ka devijuar nga marrëveshja dhe ka vendosur që për vitin 2017 suficiti primar i buxhetit të jetë 0.3 për qind e Prodhimit Kombëtar. Kjo do të thotë që qeveria do të marrë më shumë hua vitin që vjen dhe borxhi publik do të ulet më ngadalë nga sa ishte parashikuar duke vazhduar të qëndrojë në maksimumin historik prej 73 për qind.