Rama e ka ndarë mendjen, e gjithë Shqipëria të bëhet “Dibër”. Gjylameti krye koordinatore për zgjedhjet 2017

Fitorja në zgjedhjet e pjesshme për kryetar bashkie në Dibër, duket se e ka bindur Edi Ramën se pikërisht njerëzit dhe mënyra si veproi aty janë çelësi i arritjes së synimit të tij, për një mandate të dytë në zgjedhjet e ardhshme të përgjithshme elektorale.

Në zgjedhjet e Dibrës si shefe të shtabit elektoral ai caktoi deputeten Blerina Gjylameti e cila së bashku me ministrin Damian Gjiknuri, menaxhuan fitoren me të gjitha mënyrat e mundshme. Dje në mbledhjen e kryesisë së PS-së Edi Rama prezantoi edhe skemën “Dibra”, në rang vendi që do të zbatohet në zgjedhjet e ardhshme të viti 2017.

Është përcaktuar ngritja e një grupi drejtues i ashtuquajtur “bërthama”, i cili do të ngrihet brenda datës 15 nëntor që do të ketë në përbërje një ushtri të tërë, prej rreth 5850 persona.

Rama ka prezantuar edhe mënyrat se si do të funksionojë kjo strukturë drejtuese elektorale, kush do ta zgjedhë atë dhe cilat do të jenë kriteret që duhet të plotësojnë personat që do të bëhen pjesë e ekipit drejtues shkruan, Shqiptarja.com. Në krye të gjithë këtij shtabi gjigant politik, ka emëruar pikërisht shefen e shtabit elektoral në Dibër, Sekretaren për Koordinim Elektoral, Blerina Gjylameti.

Skema

Me propozim të Sekretares për Koordinimin Elektoral, Blerina Gjylameti, skema e ndjekur për ngritjen e shtabit drejtues të partisë do të jetë një ndërthurje e ndarjes administrative me atë të zonave zgjedhore. Në krye të këtij ekipi do të jetë Edi Rama dhe Kryesia e PS-së.

Pastaj skema do të ndahet në drejtuesit politikë të 6 rajoneve: Vlorë-Gjirokastër; Fier-Berat; Durrës-Tiranë; Elbasan-Korçë; Shkodër-Kukës dhe Dibër-Lezhë sikundërse deri më tani ka funksionuar me koordinatorë përkatësisht: Mimi Kodheli dhe Bledi Çuçi, Bledi Klosi, Saimir Tahiri, Taulant Balla, Ditmir Bushati dhe Lindita Nikolla.

Pas kësaj ndarjeje, do të zgjidhet një koordinator për çdo qark, ku do të zgjidhen 12 drejtues politikë të qarkut. Më pas, do të zgjidhen edhe 61 koordinatorë për çdo bashki sipas ndarjes së re administrativ. Në rend zbritës, struktura do të zbërthehet dhe do të jenë 386 koordinatorë sipas çdo njësie administrative (ish-komuna dhe bashki që u shkrinë). Për çdo Zonë të Administrimit Zgjedhor, do të zgjidhet nga një drejtues politik ZAZ-je, që përbëjnë 90 të tillë.

Më pas, ndarja në qelizë, do të jetë zgjedhja e 5301 koordinatorëve për çdo qendër votimi. Në këtë aspekt, PS do të operojë me të njëjtën skemë edhe për përzgjedhjen e koordinatorit dixhital. Nga kjo ndarje klasike referuar ndarjes zgjedhore, mund të bëhet përjashtim për ndonjë zonë, për arsye të veçanta, ku një person mund të mbulojë më shumë se një njësi, ose brenda një njësie mund të bashkëdrejtojnë dy a më shumë persona.

Përzgjedhja

Po si do të zgjidhet ky ekip? Sekretarja për Koordinimin Elektoral, Blerina Gjylameti do të jetë përgjegjëse për mbledhjen e kandidaturave të mundshme. Ky proces do të bëhet në rang qarku nga shtabi politik.

Emrat propozohen nga një grup i përbashkët i përbërë nga: i deleguari i kryesisë për qarkun, deputetët e PS-së në atë qark, kryetari i PS-së në atë bashki, kryetari i bashkisë (aty ku ai është socialist), kryetarja e Forumit të Gruas Socialiste dhe kryetari i FRESSH-it në atë njësi. Propozimet e mbledhura nga ky grup konsultativ do t’i dërgohen për vendim kryesisë së PS-së.

Struktura

Kryetari i Partisë

Kryesia e PS-së

6 drejtuesit e rajoneve

12 drejtuesit e qarqeve

61 drejtuesit e bashkive

90 drejtuesit e ZAZ-ve

396 drejtuesit e njësive administrative

5301 drejtuesit e Qendrave të Votimit

One thought on “Rama e ka ndarë mendjen, e gjithë Shqipëria të bëhet “Dibër”. Gjylameti krye koordinatore për zgjedhjet 2017

  • October 18, 2016 at 12:46 pm
    Permalink

    Lesh do fitojne sado qe do vjedhin. Nuk blehet populli i tere me leke ndaj ta harroje fitoren Rama. Ska lene njeri pa prekur me qeverisjen e vet super te keqe.

Comments are closed.