Rama e Vuçiç “përplasen” për Trepçën në Beograd, ja qëndrimet e dy kryeministrave

“Kosova” është çështja ku dy kryeministrat e Serbisë dhe Shqipërisë, nuk bien dakord. Duke u ndalur tek dialogu Prishtinë-Beograd, Vuçiç theksoi se do të vijohet në këtë drejtim. Ndonëse theksoi nuk bie dakord me shumë mënyra sesi vepron qeveria e Kosovës, Vuçiç tha se kjo është një rrugë e vështirë, e cila kërkon angazhimin serioz të palëve.
Kryeministri serb u shpreh i vendosur në rrugën e tij për forcimin e marrëdhënieve serbo-shqiptare, ndonëse tha se është i vetëdijshem se nga qytetarët e vendit të tij do të cilësohet si “mik i shqiptarëve”.
“Duhet të them se kur Edi lufton për një mbështetje më të madhe nuk ka kufi për këtë. Ai mund të flasë për këtë. Unë nuk e bëj. Ne jemi në pozicione të ndryshme vërtet. Sondazhet tregojnë rezultate të ndryshme në Shqipëri dhe Serbi. Në Shqipëri nuk ka probleme me integritetin territorial. Serbia ka. Këto janë probleme që trajtohen në mënyra të ndryshme nga BE, apo vendet tona. Njerëzit në Serbi duhet ta dinë këtë, se ne kemi pasur mbështetje të madhe nga BE, sot kemi mijëra projekte që mbështet BE në Serbi. Nuk ka asnjë organizatë tjetër që mund të krahasohet me BE lidhur me këtë. Dhe populli i Serbisë duhet ta dijë këtë.
Kam disa argumente për të përdorur për marrëdhëniet tona më Prishtinën, për të thënë se pala tjetër është fajtore, por nuk do ta them këtë. Ne do ta vazhdojmë procesin e dialogut në mënyrë pasiononte, pasi është me rëndësi për të ardhmen e rajonit. Është diçka që duhet ta bëjmë për të ardhmen e marrëdhënieve serbo-shqiptare, këto janë dy kombet më të mëdha në rajon, dhe duhet të investojmë për 100 vitet e ardhshme, duke ndërtuar vullnetin e mirë. Kështu do të jetë më e lehtë për të zgjidhur problemet. Ka shumë njerëz në Serbi që nuk e kuptojnë këtë që po them sot, madje do thonë “Vuçiç është mik i shqiptarëve”. Por ne nuk do të ndalojmë procesin e dialogut. Mendoj se duhet të gjejmë më shumë kompromise, në rast të kundërt të gjithë do të bllokohemi. Ne do të investojmë më shumë kohë, energji, edhe pse mund të jetë çdo ditë më e vështirë. Atmosfera ka ndryshuar komplet, dhe nuk është e vështirë vetëm për palën tonë, por edhe për palën tjetër”, tha Vuçiç.
Ndërsa kryeministri Rama theksoi qëndrimin e tij se “Sa më shpejt Serbia do të njohë Kosovën, aq më mirë do të jetë për rajonin”.
“Ne nuk jemi kundër Rusisë. Edhe në NATO jemi nga ato vende që kemi mbështetur rrugën drejt integrimit. Ne jetojmë në një botë ku shumë gjëra janë të ndërlidhura, dhe nuk kemi luksin për të mos folur me njëri-tjetrin edhe pse nuk jemi dakord, apo nuk jemi në të njëjtën anë. Kosova është ajo pjesë ku ne nuk biem dakord fare. Pikëpamja ime është që sa më shpejt Serbia të njohë Kosovën, dhe kjo do jetë mirë për ë gjithë. Ka një proces që e mbështet plotësisht, dhe ky është dialogu mes Prishtinës e Beogradit. Të dy liderët duhet të vlerësohen për këtë. Nuk duhet të fokusohemi se çfarë thotë një prift për vendet e shenjta, por ku duhet të ankorohet pushteti për integrimin”, tha Rama.
Sakaq kreu i Qeverisë shqiptare u ndal tek çështja e Trepçës, e cila ka ngjallur mjaft debate mes Prishtinës e Beogradit ditët e fundit. Kryeministri Rama tha se Trepça është në Kosovë dhe nuk mund të zhvendoset në Beograd.
“Nuk e kuptoj diskutimit për Trepçën. Tani Trepçën nuk mund ta zhvendosni këtu në Beograd. Ajo është një minierë në Kosovë, kështu që nuk mund të ndryshohet. Por si mund të ecet përpara pa pastruar këto probleme. Mund të kuptoj të gjithë argumentet, por kur dikush kalon kufirin për herë të 10, dhe njëherë në 10 arrestohet çfarë do t’u thotë kjo njerëzve? Besoj se në Kosovë dhe Serbi, prioriteti duhet të jetë që të bëjmë njëri-tjetrin të lumtur. Duhet të shqiptarët në jug të Serbisë dhe serbët në veri të Kosovës të jenë të lumtur, dhe të marrin fund këto diskutime”, tha Rama.
Pas kësaj nuk mund të mungonte ndërhyrja e kryeministrit serb Aleksandar Vuçiç, i cili tha se homologu i tij shqiptar guxoi të bënte një politikë ditore në forum për këtë çështje.
“Kur pashë praninë e mediave kosovare këtu, e dija se Edi do të bënte një politikë ditore. Unë nuk e bëra këtë. Por Edi është politikan më i mirë se unë. Ai foli për Trepçën, por unë guxoj të them se di më shumë se Edi për këtë. Ai tha se është çështje ekonomike, por mund të them se Prishtina bëri lëvizjen më të keqe sa i takon Trepçës. Nëse do të thuash se kjo është për ët mirën e serbëve dhe shqiptarëve, a mund të gjesh një serb që të jetë dakord me këtë?”, tha Vuçiç.