Rama mbron Donald Lu-në në Parlament

Një ditë pas sulmeve të ish-kryeministrit Berisha dhe kreut të PD-së, Basha, ndaj ambasadorit të SHBA-ve në vendin tonë, Donald Lu, kreu i qeverisë Edi Rama ka folur në mbrojtje të tij nga foltorja e Kuvendit.

Në përgjigje të kërkesës së PD-së për referendumin e importit të mbetjeve, bërë nga deputeti demokrat Eduard Halimi në nisje të seancës, Rama ka thënë jo pa ironi, se i vetmi referendum i sinqertë i PD do ishte ai për të përzënë ambasadorin Lu.

“Vetëm një referendum do ishte sot i sinqertë por të propozohej nga PD, ai për të ndërprerë procesin e integrimit në BE dhe për të përzënë ambasadën amerikane nga Shqipëria, por sigurisht që kjo është diçka që zemra mund t’ua dojë, por gjunjët nuk ua mbajnë. Ndërkohë që kazani më i madh i mbeturinave të korrupsionit, krimit, mafias, është sistemi i drejtësisë dhe sot ne kemi këtu një ditë pasi PD i ka shpallur luftë reformës në drejtësi dhe ka marrë haptazi anën e kazanit”- tha Rama.

Rama theksoi më tej se “PD në 21 korrik votoi me pahir reformën kushtetuese duke shpallur madje edhe fitoren si ai prifti që kërcente nga balaja, ka dorëzuar në Kushtetuese kërkesën për të rrëzuar themelin e reformës, vetingun që do të pastrojë kazanin e sistemit të drejtësisë nga plehrat. Dhe sot axhenda e këtij kuvendi është vazhdimi me vendosmëri i rrugës për të cuar para reformën do apo jo PD, i pëlqen apo jo asaj, voton apo jo, PD”.

Rama kujroi se fati i reformës dhe hapja e negociatave lidhet edhe me 7 ligje prioritare. “Në aleancë të hapur me korrupsionin krimin dhe mafien që mban peng sistemin e drejtësisë, ligjet e tjera që hapin rrugën për fillimin e zbatimit të reformës i ka ndarë si një menu ku thonë këtë e hamë, këtë nuk duam ta prekim me dorë. kanë ndarë si gjithmonë vetëm SPAK dhe bëjnë sikur nuk e dinë, që kjo strukturë pa institucionet e tjera nuk ngrihet”- tha ai.