Rama tallet me qytetarin : S’ke ardhur nga puna, ke ardhur nga rakia”

Kryeministri, Edi Rama gjatë një takimi me banorë të Manzës në zonën e Durrësit është përballur me një situatë të pakëndshme. Një prej të pranishmëve ka shprehur ankesa para përfundimit të fjalës hapëse të Ramës.

Kryeministri i tërhoqi vëmendjen që të mos e pengojë më, duke i kujtuar se ishte i dehur. Rama refuzoi që t’i jepte fjalën duke i thënë se kishte pirë raki dhe të mos e ndërpriste më gjatë fjalës së tij.

“Duke e parë gjendjen tënde shumë të rënduar, më lër të mbaroj dhe të vazhdoj me të tjerët. Nuk ta jap fjalën dhe mos e zgjat. Të lutem mos na shqetëso më, e di që je socialist, je shumë socialist, por kjo s’të jep drejtë. S’ke ardhur nga puna, ke ardhur nga rakia”, iu drejtua Rama.

Socialisti pavarësisht se nuk e mori fjalën, ishte gjatë mbledhjes një shqetësim për Ramën pasi vazhdimisht ndërhynte. Më tej gjatë takimit, Rama kërkoi që ‘socialisti’ të nxirrej jashtë sallës.