Rama-Vuçiç forcojnë marrëdhënien, Kosova e përjashtuar

Në Kosovë po kritikohet shumë sjella e Kryeministrit shqiptar Edi Rama në Serbi. Ato shkruajnë se Shqipëria dhe Serbia po forcojnë shumë marrëdhëniet, pasi Rama dhe Vuçiç kanë vënë në mes marrëdhënien personale. Kështu nga sot, Shqipëria dhe Serbia do të kenë edhe një dhomë të përbashkët ekonomike – tregtare.

“Natyrisht, diçka të tillë Shqipëria nuk ka me Kosovën, pasi Prishtina dhe Tirana ende nuk e kanë tejkaluar as “çështjen e patateve” në raportet tregtare”, shkruajnë mediat në Kosovë.

Sot në Nish, Serbi, ka filluar punimet Forumi i Biznesit, Serbi – Shqipëri, i cili po udhëhiqet nga kryeministrat Vuçiç dhe Rama. Në forum marrin pjesë rreth 300 përfaqësues të kompanive dhe bizneseve nga të dy vendet.

Duke e hapur Forumin, Vuçiç ka thënë se “avancimi i marrëdhënieve u sjell të mira qytetarëve dhe nga ky bashkëpunim varet e ardhmja tyre, ashtu që nuk duhet lënë që dikush tjetër t’i rregullojë marrëdhëniet tona”.

Në një takim të tillë ishte paraparë të marrë pjesë edhe Dhoma Ekonomike e Kosovës, por si duket kjo nuk ka ndodhur për arsye politike, pasi pala serbe nuk ka pranuar që atje të jenë përfaqësuesit e shtetit të Kosovës.

Kryeministri serb me këtë rast ka ftuar biznesmenët shqiptarë të investojnë në Serbi.

Kryeministri i Shqipërisë Edi Rama ka thënë se pavarësisht nga dallimet politike, marrëdhëniet Serbi – Shqipëri po zhvillohen në drejtimin pozitiv dhe në dobi të banorëve të dy shteteve, ndërsa i ka ftuar biznesmenët serbe në Shqipëri, shkruan portali Lajmi.net.