Reforma në Drejtësi, 6 ligjet miratohen sot në Parlament pa opozitën

Parlamenti do të votojë sot 6 projektligjet e paketës së Reformës në sistemin e Drejtësisë. Maxhoranca dhe opozita pritet të bashkojnë votat vetëm për një prej projektligjeve që cilësohet si më kryesori për luftën kundër korrupsionit, raporton “Panorama”.

Bëhet fjalë për projektligjin “Për organizimin dhe funksionimin e institucioneve në luftën kundër korrupsionit dhe krimit të organizuar”, ose siç njihet ndryshe, ligji i SPAK-ut. Ky është i vetmi projektligj që opozita ka deklaruar se do ta votojë, për shkak se në këtë draft janë reflektuar shqetësimet e pakicës, lidhur me kontrollin e figurës dhe pasurive të gjyqtarëve dhe prokurorëve të strukturave antikorrupsion.

Ndërkohë që 5 projektligjet e tjera pritet të votohen vetëm me votat e maxhorancës. Projektligjet që do të miratohen kërkojnë minimalisht 84 vota pro, që në gjuhën juridike quhet “shumicë e cilësuar”. Këto vota maxhoranca e majtë i disponon, por duket se kjo shumicë do të tejkalohet vetëm për projektligjin e SPAK-ut, që do të krijojë institucionet e reja, Gjykatën e Posaçme Antikorrupsion, Prokurorinë e Posaçme dhe Byronë Kombëtare të Hetimit.

Në projektligj është parashikuar që një mision i ekspertëve të BEsë dhe SHBA-ve të ndihmojë për një periudhë dyvjeçare ngritjen e Byrosë Kombëtare të Hetimit.

“Një Komisioni i përbërë nga ekspertë të drejtësisë penale, të caktuar nga misionet e Bashkimit Europian dhe qeverisë së Shteteve të Bashkuara të Amerikës në Shqipëri, do të japë udhëzime dhe këshilla për themelimin dhe zhvillimin e Byrosë Kombëtare të Hetimit, për një periudhë 2- vjeçare, duke nisur nga momenti i themelimit të kësaj Byroje.

Komisioni i Pavarur i Rishikimit vëzhgon në mënyrë aktive procesin e rekrutimit dhe trajnimit të punonjësve të Byrosë Kombëtare të Hetimit, si dhe miraton materialet e trajnimit të hetuesve dhe drejtorit të Byrosë Kombëtare të Hetimit”, thuhet në dispozitën kalimtare të projektligjit të SPAK-ut. Institucionet e reja do të krijohen 300 ditë nga hyrja në fuqi e paketës së 6 ligjeve.

ARRITJA E KONSENSUSIT

Opozita do të japë konsensus për projektligjin e SPAK-ut, sepse në këtë draft arriti të plotësojë një nga kërkesat kryesore, që procesi i vetingut për gjyqtarët dhe prokurorët e strukturave antikorrupsion të mos kryhet nga institucionet në varësi të Qeverisë. Kjo marrëveshje u arrit falë negociatave intensive mes ekspertëve të opozitës dhe atyre amerikanë të OPDAT-it.

Në parashikimet ligjore është vendosur që 2 vjet pasi të jenë ngritur strukturat antikorrupsion, kontrolli i pasurive dhe figurës së prokurorëve dhe gjyqtarëve dhe anëtarëve të Byrosë Kombëtare të Hetimit të bëhet nga një komision i përbërë nga dy prokurorë të Njësisë Antikorrupsion dhe një gjyqtar i po kësaj strukture, që do të zgjidhen me short.

Duke i hequr në këtë mënyrë të drejtën që llogaritë bankare, bisedat telefonike, pastërtia e figurës të kryhet nga Inspektorati i Deklarimit të Pasurive dhe Drejtoria e Përgjithshme e Parandalimit dhe Kontrollit të Pasurive. /Panorama/