Reshjet në Lezhë, përmbytje në disa lagje të qytetit. Banorët: Na janë dëmtuar dhjetëra hektarë tokë

LEZHE– Reshjet e rëna gjatë natës kanë sjellë sërish përmbytje në Lezhë. Uji ka arritur në disa centimetra në disa rrugë të qytetit dhe në blloqet e pallateve. Raportohet se problemet më të mëdha janë hasur në lagjen “Besëlidhja”, “Kodërmarlekaj” dhe në zonën e njohur si “Blloku 11.2 hektarë”.

Në këto lagje është shënuar prezencë uji në 3 banesa dhe disa garazhe.

Ndërkohë në zonën e Zadrimës janë dhjetëra hektarë sipërfaqe tokë bujqësore të përmbytura. Bashkia e qytetit të Lezhës po ndërhyn për zhbllokimin e sistemit të kanalizimeve. Sakaq bëhet me dije se si pasojë e reshjeve të shiut, ka rritje të prurjeve në lumin Drin, niveli i të cilit është 30-40 cm poshtë pikës kritike.

Nisur nga situata e krijuar, punonjësit e Bashkisë së qytetit kanë nisur punën për zhbllokimin e pusetave dhe normalizimin e situatës.

Banorët thonë se kjo është hera e dytë në pak ditë që përmbyten si pasojë e reshjeve.

“Askush nuk ka ardhur të interesohet për gjendjen. Na janë dëmtuar dhjetëra hektarë tokë”, thonë banorët.

SITUATA NË LEZHË, MINISTRIA E BUJQËSISË JEP INFORMACIONE
Nisur nga situata e reshjeve të dendura mbrëmjen e djeshme dhe gjatë natës, Ministria e Bujqësisë, Zhvillimit Rural dhe Administrimit të Ujrave njofton se, që nga ora 19.00 e ditës së djeshme (e martë), në rrethin e Lezhës kanë rënë 106 mm shi, me një intensitet më të lartë deri rreth orës 01.00 të pasmesnatës, në zonën Grash – Zojs – Mabe të Zadrimes. Ndërsa në zonën e Dajçit kanë rënë 72 mm shi, në qytetin e Lezhë 82 mm dhe në fshatrat në Jug, kryesisht në Tale, kane rënë 120 mm, si dhe në zonën e Torovicës.

Si pasojë e këtyre reshjeve, deri rreth orës 10.00 të ditës së sotme, gjenden nën ujë, në Zadrime rreth 350 hektarë toka, në Torovicë rreth 350 ha, Zejmen – Barbullojë, rreth 150 hektarë.

Në rrethin Kurbin, nga përmbytja e kaluar kishte ende ujë të palarguar dhe ka shtesë në siperfaqe nën ujë, kryesisht rreth nënkalimit të Laçit dhe në Sanxhak.

Kuota e Drinit wshtw 1.2 nga 2.5 që është maksimalja. Ndërsa në orën 06:30, ishte 1.6.

Tërheqja e ujit vazhdon normalisht, çka do të thotë se, hidrovoret punojnë me kapacitet të plotë dhe rrjeti është në funksion.

MBZHRAU ka në terren të gjitha strukturat e saj në qakun Lezhë, për të monitoruar dhe mbajtur nën kontroll situatën, e cila është drejt përmirësimit.