Rexhep Meidani ka deklaruar se zgjedhjet elektorale të vitit të ardhshëm janë në rrezik

Ish presidenti  Rexhep Meidanidhe një nga themeluesit e Partisë Socialiste, ka deklaruar se zgjedhjet elektorale të vitit të ardhshëm janë në rrezik. Sipas tij kërcënimi kryesor për këto zgjedhje është moszbatimi i ligjit të dekriminalizimit.

Mejdani e bëri këtë deklaratë në tryezën e organizuar nga Koalicioni i Vëzhguesve Vendorë, mbi financimin e partive politike. Ish presidenti kërkoi që përzgjedhjet e kandidatëve për deputetë duhet të bëhet në mënyrë të hapur dhe transparente nga partitë politike.

“Problemi kryesor për të ardhmen e qeverisjes është përzgjedhja e kandidatëve, madje detyrimi ligjor për një përcaktim apo përzgjedhje publike, të hapur e transparente të tyre. Gjatë regjistrimit të kandidatit, krahas kërkesave të ligjit të dekriminalizimit, duhet të përfshihen dhe kërkesa shtesë, të lidhura me elementë etikë e moralë të tij, me vetë integritetin e kandidatit, me deklarimin e pasurisë, të biznesit (nëse ka të tillë) dhe të ardhmen e tij në angazhimin e ardhshëm publik në respektim të ligjit. Kjo deri me përgjegjësi ligjore të drejtuesit apo strukturës që ka mbyllur sytë për kandidatë që nuk plotësojnë nene të caktuara të ligjit të dekriminalizimit”, u shpreh Meidani në fjalën e tij.

Ish presidenti në këtë logjikë nënvizoi edhe faktin e krijimit të një kategorie “biznesmeni-politikan”, fenomen që sipas tij është shumë i dukshëm në Grupin Parlamentar të PS-së.

“Qytetarët në krijimin e qeverisjes qendrore e vendore, sidomos në luftën kundër korrupsionit, kanë votën për ta ndryshuar atë, dhe për të larguar të korruptuarit nga pushteti. Në fakt, një pikënisje e kësaj lufte janë zgjedhjet, sidomos financimi i tyre. Po ashtu, janë shfaqur “teprime” në përfshirjen në politikë të shumë biznesmenëve, jo thjesht për financime fushate, por në mënyrë të drejtpërdrejtë, me anë të kandidimit të tyre. Madje, është rritur dukshëm një kategori e re e llojit:

“biznesmen-politikan” apo “politikan-biznesmen”, deri me të dhëna të dyshimta morale-financiare të disave prej tyre. P.sh., në Grupin Parlamentar të PS-së kjo ka qenë krejtësisht e dukshme”, shtoi Meidani.