Shefi i antimafias në Leçe: Shqipëria, ndër furnizuesit kryesorë të drogës

Gazetari i RAI-t, Leonardo Zellino publikoi pak ditë më parë një reportazh të shkurtër të realizuar në Shqipëri, në lidhje me kultivimin e kanabisit. Gazetari u shpreh se droga nga Lazarati është spostuar në malet e Krujës.

“Zbresim nga makinat dhe na bllokon një bari i rremë që ndryshon qëndrim sapo sheh kamerat. Kuptojmë se po na ruajnë”, rrëfen gazetari. “Ju kanë parë atje dhe më lajmëruan, shiko se janë me kamera”, thotë bariu i rremë. Ndërsa vijon: “Ka snajpera dhe të qëllojnë”.

Më pas një guidë i tregon rrugën për në vendin ku është kanabisi por pa kamera. Filmimi bëhet me celular. “Më shumë se një orë rrugë, – thotë gazetari- ka marijuanë por nuk mund të ndalemi sepse personi që na udhëheq është autorizuar vetëm që të na çojë në plantacionin e tij”. Kur shkojnë gazetarët shohin kanabisin e shkatërruar dhe gjithë infrastrukturën për vaditjen e bimëve. Pronari i kanabisit thotë se ia kanë shkatërruar policë të ardhur nga Tirana jo ata që i njeh mirë.
“Kjo – thotë pronari duke mbajtur një bimë kanabis të tharë në dorë- kushton 100 euro. 60 për mua dhe 40 për policinë”.

Ky reportazh shkaktoi polemika të shumta në Shqipëri, dhe Rai ka sjellë sërish në vëmendje çështjen e kultivimit të kanabisit në tokën e shqiponjave, sikurse e quajnë italianët vendin tonë.

“Udhëtimi jonë në malet e Krujës ka bërë shumë zhurmë në Shqipëri. Ditën pas publikimit të reportazhit nga RAI, gazetat kryesore në Shqipëri janë hapur me investigimin tone për kultivimin e kanabisit. Nga gazetat, u kalua në parlament ku opozita e drejtuar nga Lulzim Basha i është vënë kundër qeverisë”- shprehet gazetari i RAI-t.

Deklaratat e Ministrit të Brendshëm Saimir Tahiri, se Shqipëria nuk është vend problematik sa i përket trafikut të drogës, i ka hedhur poshtë shefi i antimafias në Leçe, i cili shprehet se Shqipëria është ndër furnizuesit kryesorë të drogës.

KRONIKA E RAI-t
Gazetari RAI: Udhëtimi jonë në malet e Krujës ka bërë shumë zhurmë në Shqipëri. Ditën pas publikimit të reportazhit nga RAI, gazetat kryesore në Shqipëri janë hapur me investigimin tone për kultivimin e kanabisit. Nga gazetat, u kalua në parlament ku opozita e drejtuar nga Lulzim Basha i është vënë kundër qeverisë
Lulzim Basha: Prodhimi i drogës është aktiviteti ekonomik kryesore sot në Shqipëri, ku burimet kryesore si njerëzore dhe financiare po i drejtohen kultivimit të kanabisit.
Gazetari RAI: Edhe pse Ministri i Brendshëm kishte deklaruar komplet të kundërtën.
Saimir Tahiri: Shqipëria nuk është vend problem në trafikun e drogës.
Gazetari RAI: Por përgjigjja për Tahirin vjen nga Leçe, nga prokurori Cataldo Motta shefi i distriktit antimafia në Leçe, titullari i të gjitha dosjeve për trafikun në kanalin e Otrantos.
Cataldo Motta: Problemi është i joni, sepse jemi vetëm 44 milje nga Vlora, është Puglia që tashmë është porta hyrëse për europën perëndimore.
Gazetari RAI: Puglia, porta hyrëse e Europës, ku vetëm në ditët e fundi janë kapur 6 trafikante me 1 ton kanabis, në dy operacione të ndryshme nga Guardia di Financa dhe skuadra mobile e Leçes.
Saimir Tahiri: Mendoj se statistika jote nuk është e vërtetë sepse në 2013 vinte me shumë drogë në Itali nga brigjet tona.
Gazetari RAI: Të dhënat tona janë të njëjta me Prokurorin Motta, të cilat flasin për një boom kanabisi drejt Italisë.
Cataldo Motta: Këtë vit kemi pasur sasi tepër të mëdha droge të sekuestruara, vetëm në javën e fundi të shtatorit Guardia di Financa ka sekuestruar 3 ton e 800 kg marijuanë.
Gazetari RAI: Tonelata me tonelata droge, po si ka mundësi në 5 vitet e fundit kjo situatë, por prokurori Cataldo Motta ka një shpjegim.
Cataldo Motta: Mendoj se bashkëpunimi që ishte në të shkuarën me autoritetet shqiptare është ftohur, ndoshta ka rënë interesi i autoriteteve shqiptare.
Gazetari RAI: Deklaratat e Motës nuk e kapin në befasi kryetarin Basha, i cili hedh akuza të rënda për qeverinë, të cilat i përkthejmë siç ai i thotë.
Lulzim Basha: Kultivimi i drogës është lejuar nga qeveria e cila me ato fonde do blejë zgjedhjet e vitit tjetër.
Gazetari RAI: Kjo thotë Basha bëhet me implikimin e strukturave të korruptuara të Policisë, me gjobën që u merret kultivuesve për policinë.
Gazetari RAI: Ministri Tahiri na kishte ftuar të shikonim në shtëpinë tonë për shumë plantacionet që zbulohen në Puglia.
Cataldo Motta: Edhe në Itali ka plantacione, por sigurisht jo të mëdhaja dhe të pakrahasueshme me Shqipërinë, sepse përndryshe nuk do kishim nevojë për importin nga Shqipëria, nëse do ishte situatë e krahasueshme me Shqipërinë. Mund të them se Shqipëria ka hyrë në rrugën e të qënit një nga furnizuesit kryesorë të substancave të drogës. Kur ne kemi në përgjim një telefonatë ku është prezent një shqiptar, në 90 % të rasteve bëhet fjalë për trafik të organizuar të substancave të drogës.

KRONIKA ORIGJINALE-kliko linkun me poshte.

http://www.rai.it/dl/RaiTV/programmi/media/ContentItem-207de061-eec7-4d01-ab88-c9fcfd48b451-tgr.html?refresh_ce

(er.nu/BalkanWeb)