Shënohet dita e VMRO-së, nesër ditë jopune në Maqedoni

Në Maqedoni sot është shënuar e ashtuquajtura Ditë e Luftës Revolucionare të Maqedonisë, që në fakt është dita kur në vitin 1893 në Selanik u themelua Organizata e Brendshme Revolucionare Maqedonase, apo siç njihet botërisht – VMRO-ja.

Me këtë rast, delegacionet e Kuvendit dhe Qeverisë së Maqedonisë vendosën lule para përmendores së themeluesve të VMRO-së në Parkun “Gruaja luftëtare”.

Këshilli për ndarjen e çmimit shtetëror “23 Tetori” sot ndau çmimin shtetëror “23 Tetori” për vitin 2016 për realizime shumëvjeçare në sferën e shkencës, kulturës, arsimit, mbrojtjes së interesave shtetërore dhe promovimit të prioriteteve shtetërore, vlerave dhe trashëgimisë kulturore-historike të Republikës së Maqedonisë.

Çmimi shtetëror “23 Tetori” për realizime në sferën e kulturës dhe artit u ndahet artistit të artit figurativ Rexhai Iseni, profesorit të muzikës dr. Dragan Dautovski dhe aktorit Ivan Petrushevski.

Për realizime në fushën e shkencës dhe arsimit, fitues të sivjetmë janë Agim Poloska albanolog dhe Stefan Vllahov, historian dhe filozof.

Meqë kjo është festë shtetërore në Maqedoni, ndërsa sivjet 23 tetori ra ditën e diel, sipas rregullit, ditë jopune është e hëna, respektivisht dita e nesërme.

VMRO-ja njihet si organizimi i parë për pavarësimin e Maqedonisë nga pushtimet dhe ndikimet e ndryshme, kryesisht serbe dhe bullgare, ndërsa historia e njeh edhe si organizatë që shumë shpesh ka përdorur metoda terroriste për të arritur qëllimet e veta.