Sherri mes të rinjve në FB, xhaxhai i të plagosurit: Autori, ende i lirë

Flamur Koçeku, xhaxhai i Amarildos, me një thirrje të fortë i drejtohet prokurorisë që të hetojë mbi ngjarjen ku iu plagos i nipi. Sipas tij, njëri prej autorëve vijon të jetë ende i lirë, dhe liria i është dhënë nga Policia e Tiranës vetëm 2 orë pasi ai ishte vetëdorëzuar.

Zoti Flamur, si e morët vesh ngjarjen ku mbeti i plagosur nipi juaj?
Unë ngjarjen e mora vesh nga një komshiu im. Më mori në telefon dhe më tha që është bërë një vrasje dhe aty ka qenë edhe Amarildo. Kam dalë menjëherë dhe kam shkuar në vendngjarje, por nuk e gjeta atje. E kishin sjellë në spital.

Keni biseduar me Amarildon pasi ndodhi plagosja dhe çfarë ju ka thënë ai?
Po, kam biseduar me të dhe më tregoi gjithçka kishte ndodhur. Por Amarildo është i plagosur, është i dëmtuar, dhe ky është fakti real.

A keni bërë denoncim në polici? Po informacion, keni marrë se deri ku kanë shkuar hetimet mbi plagosjen e nipit tuaj dhe nëse janë arrestuar personat përgjegjës?
Nuk kemi bërë asnjë denoncim. Por di të them që pas ngjarjes nipit tim i kanë vënë një masë arresti, dhe kjo gjë është e padrejtë. Një nga autorët u arrestua dhe më pas u lirua.

Cili është apeli juaj?
I bëj thirrje prokurorisë që të rinisë hetimet urgjentisht për personin që sot është i lirë. Ai u vetëdorëzua dhe u mbajt vetëm 2 a 3 orë në Drejtorinë e Policisë së Tiranës e më pas u lirua direkt, pa iu prerë fleta e arrestit. Personi që nisi sherrin, Shpëtim Taho, sot është akoma i lirë. Ndërkohë që është arrestuar vetëm nipi i tij, që qëlloi me armë, dhe arrestimi i tij është bërë vetëm për të mbuluar pisllëqet e tyre që mund të kenë bërë me Policinë e Shtetit. Ne ua kemi lënë në dorë shtetit dhe drejtësisë që të merren me ngjarjen.

A ju ka takuar apo kontaktuar ndonjë prej familjarëve të autorëve pasi ndodhi plagosja?
Absolutisht asnjë! As nga ajo palë e as nga shteti. Dhe nuk kemi marrë asnjë informacion se si po vijojnë hetimet.