Shkodër, e vrau me plumb në kokë, dorëzohet në polici 21-vjeçari

Pas 10 orësh në kërkim, është dorëzuar në Policinë e Shkodrës i riu që ekzekutoi me plumb në ballë 42-vjeçarin Genc Mëhillaj mesditën e djeshme në fshatin Mali i Jushit.

I riu Jozef Mujeci qëlloi në distancë të afërt viktimën pas një sherri që patën dy ditë më parë. Ngjarja nisi kur 42-vjeçari i kërkoi 21-vjeçarit që t’i hapte rrugën me makinë, por autori i tha që të priste. Kaq mjaftoi që mes tyre të niste sherri dhe viktima ofendoi dhe shtyu Jozef Mujecin.

Ky i fundit i tha që t’i kërkonte falje, gjë që nuk u pranua nga viktima. Kjo gjë acaroi të riu, i cili i bëri të ditur 42-vjeçarit se do t’i kishte punët keq dhe u largua drejt banesës së tij.

Ai kishte vetëm 1 javë që ishte kthyer nga Belgjika ku dhe jeton, ndërsa mëngjesin e djeshëm kishte marrë pistoletën dhe ndoqi viktimën duke e qëlluar me plumb në kokë.

Pas vrasjes, ai u largua në drejtim të paditur. I riu u identifikua dhe u shpall në kërkim nga policia. Pas 10 orësh, 21-vjeçari Jozef Mujeci u vetëdorëzua në Policinë e Shkodrës./Syri.net/