Shkodër, sekuestrohen 50 kg drogë e paketuar gati për shitje, në kërkim 5 kultivuesit

SHKODER- Plot 50 kilogramë kanabis e paketuar dhe gati për shitje është sekuestruar mbrëmjen e djeshme nga policia e Shkodrës. Gjatë një aksioni antikanabis në fshatin Kir, njësia administrative Pult, pas informacioneve të siguruara në rrugë operative, policia ka mundur të gjejë lëndën narkotike të paketuar, si dhe 385 bimë cannabis sattiva në proces tharje, por pa mundur të kapë kultivuesit. Në kuadër të operacionit “Muzgu”, policia e Shkodrës ka shpallur në kërkim 5 persona, B.M, 21 vjeç; G.M, 43 vjeçe; F.P, 42 vjeç; Gj.P, 31 vjeç; K.Gj; (të gjithë banues në fshatin Kir).

“Më datë 18.10.2016 gjatë kontrolleve të ushtruara në banesat e tyre janë gjetur dhe sekuestruar në total 50 kg lëndë e dyshuar narkotike e paketuar nëpër thasë gati për shitje si dhe 385 bimë të dyshuara narkotike cannabis sattiva të cilat ishin në proces tharje dhe u asgjësuan me anë të djegies.

Vazhdojnë hetimet për kapjen e autorëve të implikuar në veprimtarinë kriminale të fushës së prodhimit dhe shitjes së lëndëve narkotike”, thuhet në njoftimin e policisë