Shokon Xhokoviç: Më ka ikur dëshira për të luajtur tenis

Është akoma tenisti më i mirë në botë, mirëpo diçka nuk është më si në fillim. Po flasim për serbin Novak Xhokoviç, i cili kaloi një sezon veror të vështirë, me zhgënjime dhe më së shumti jashtë fushave të tenisit. Që pas triumfit në grand slemin e “Roland Garros”, i vetmi nga turnetë e mëdhenj që i mungonte numrit 1 në botë, loja e tenistit serb ka qenë e dobët, pa nerv e dëshirë.

Dëmtimet dhe mungesa e dëshirës kanë ndikuar në paraqitjen e Xhokoviçit, që mori një muaj pushim pas Olimpiadës, duke shpresuar që të rigjejë ritmin. Dhe këtë gjë kërkon ta bëjë nga turneu Masters i Shangait, që nisi dje.

“Këtë herë, afrimi me turneun e Shangait është ndryshe nga herët e tjera. Pas ‘Roland Garros’ kam vuajtur shumë në gjetjen e motivacionit të duhur për të luajtur, por ngaqë isha i lodhur fizikisht e mendërisht. Pata shumë luhatje në lojë, pasi më mungonte dëshira, të cilën shpresoj ta rigjej nga turneu kinez.

Gjërat e tjera kanë dalë në plan të dytë, nuk mendoj shumë për trofetë apo për kreun e renditjes. Më duhet të rigjej ekuilibrat brenda meje dhe më pas gjërat e tjera vijnë vetë. E pranoj që më është larguar dëshira për të luajtur tenis”, deklaroi 29-vjeçari, i cili sot debuton në Shangai.

Më tej, ai shtoi: “Nuk dua t’i zhgënjej tifozët e mi, pasi ata gjithmonë më kanë mbështetur. Marrej? Ka bërë një sezon të jashtëzakonshëm. Ai është një rival shumë i fortë, por nuk do ta ketë të thjeshtë të ngjitet në krye të renditjes së përgjithshme botërore”./panoramasport