Shqipëria – Kosova, dyfytyrësia e Shakohoxhës (Video)

Dritan Shakohoxha, komentatori i “Super Sportit”, sot është njëri nga më të zëshmit kundër përfaqësueses së Kosovës dhe një nga ata që dëshiron vetëm një Kombëtare. Por, para katër viteve ai kishte mendime të tjera
Dritan Shakohoxha insiston se Kosova dhe Shqipëria duhet të kenë një Kombëtare, se lojtarët më të mirë duhet të luajnë për Shqipërinë, ndërsa të tjerët që mbesin për Kosovën. E megjithatë, ai nuk kishte pasur gjithmonë mendime të tilla, madje-madje kishte pasur mendime krejt të kundërta nga ato që i ka sot.

Atëherë kur Kombëtarja shqiptare nuk kishte kaq të hyra financiare, nuk përfitonte shumë para, nuk kishte kaq shumë sponsorë, nuk ishte kaq e fortë, nuk kishte kaq shumë lojtarë kosovarë, Kosova nuk ishte e pranuar në UEFA dhe FIFA, Shqipëria nuk rrezikohej se do t’i merreshin lojtarët, Shakohoxha ishte kundër bashkimit të ligave, Kombëtares dhe insistonte se nuk jemi racë për t’u bashkuar, por për t’u ndarë.

Ai madje proklamonte se kështu do të jemi edhe më të fortë financiarisht dhe se të gjithë shqiptarët duan të përfaqësohen në më shumë skuadra, shkruan Express.

“Nuk dua të ndjehem kundër të gjithëve që janë këtu në studio, por unë nuk mendoj se kjo është një gjë e mirë për futbollin shqiptarë, për Shqipërinë, për të gjithë shqiptarët nuk është një gjë e mirë, sepse të gjithë shqiptarët duhet të kenë objektivat e tyre”, kishte thënë fillimisht Shakohoxha, në emisionin Opinion, më 30 janar të vitit 2012.

“Me përfaqësimin e Kosovës do të kemi më shumë mundësi, do të jetë mundësi më e madhe. Bashkimi është objektiv praktikisht i parealizueshëm, sidomos për racën tonë. Ne jemi një racë që kemi dy mijë parti, dymijë gazeta, kemi gjithçka në shumës, kemi pesë shoqata gazetarësh, kemi tre federata noti, kemi dy federata çiklizmi në Shqipëri, dy federata pingpongu”.

“Pra, shqiptarët nuk e gjejnë veten në një gjë, kështu që për racë për të qenë të sinqertë, ne do të kemi edhe Kosovën edhe Shqipërinë, duhet t’i kemi dy mundësi sepse, edhe nga ana financiare ku duhet të jemi të gjithë të përgjegjshëm, që nëse bëhen një limitojnë financiarisht njëri tjetrin”, vazhdoi ai.

“Kjo nuk do të realizohet dhe unë jam kundër, sepse Kosova shumë shpejtë do të bëhet shtet në vete i njohur nga të gjithë edhe nga UEFA dhe FIFA”, kishte thënë Shakohoxha në fund.