Shqipëria U19 nis me humbje eliminatoret

Nisi me një humbje 1-0 ndaj Republikës së Irlandës në Selman Stërmasi aventura e kombëtares shqiptare të 19-vjecarëve në grupin 4 kualifikues për eliminatoret e Europianit të vitit 2017 që do të zhvillohet në Gjeorgji. Skuadra e Arjan Bellait shfaqi grintë dhe dëshirë në këtë takim por kuqezinjëve të vegjël u mungoi finalizimi duke mos e nisur mirë rrugën e tyre në grupin 4 eliminator.

Me Selmanin në portë dhe kapitenin Maloku në mbrojtje, Shqipëria u paraqit mirë në minutat e para. Në të 11-tën Kallaku rrezikoi portën kundërshtare pas një rrëmuje në zonë por topi përfundoi jashtë kuadratit. Me kalimin e minutave frenat e lojës i mori Republika e Iralndës. Në të 19-tën Ronan provoi me një goditje të fortë nga distanca por nuk gjeti portën. 6 minuta më pas tentativa me kokë e sulmuesit të miqëve Barrett ishte e lehtë për gardianin e Lacit Gentian Selmani.

Në të 33-tën portieri i talentuar shqiptar ndali një kundërsulm të rrezikshëm të skuadrës irlandeze duke reaguar shumë mirë pas goditjes së Hale. Në të 42-tën u regjistrua edhe episodi që vendosi fatet e kësaj sfide.

Doksani preku topin me dorë brenda zone pas një harkimi nga këndi dhe arbitri kryesor nuk kishte asnjë dyshim duke akorduar 11-metërsh për irlandezët. Goditjen nga pika e bardhë e mori përsipër Ronan, Selmani kuptoi shumë mirë krahun duke prekur edhe topin por për fare pak nuk arriti të ndalte në rrugën drejt rrjetës. 0-1 për Republikën e Irlandës.

Kombëtarja shqiptare e 19-vjecarëve u përpoq të reagonte por në minutën e 2-t shtesë të pjesë së parë Cema gaboi në goditje duke mos befasuar dot portierin e Irlandës.

Edhe pjesa e dytë foli më shumë për skuadrën mike. Në të 51-tën fati ishte me kuqezinjtë pasi shtylla i tha jo golit të Barrett. Në minutën e 74 skuadra e Arjan Bellait ishte sërish me fat pasi Elbouzedi shumë pranë portës nuk shënjestroi sic duhet. Në të 91-tën Selmani më i miri në fushë për Shqipërinë evitoi golin e dytë të Iralndës me një pritje të shkëlqyer ndaj Barrett. Në Selman Stërmasi gjithcka u mbyll me fitoren 1-0 të Republikës së Irlandës.

Pas kësaj disfate ndaj një rivali direkt të besuarit e Arjan Bellait humbën kështu një mundësi të mirë për të tentuar kualfikimin në Elite Round duke patur parasysh edhe faktin që Shqipëria ka në grup edhe Gjermaninë. /SS/