Shqiptarja shpëton të moshuarën gjermane. Nderohet nga policia

84-vjeçarja Waltraut Stork, më 5 shtator, pasi kishte bërë pazaret në një qendër tregtare në Gütersloch të Gjermanisë, kur po largohej, ndalohet nga dy gra në parkingun e qendrës.

Ato, me pretekstin se duan të flasin me të, duan t’i marrin portofolin me para, shkruan dieglockeonline.de. Njëra prej tyre gjatë bisedës ia nxjerr portofolin nga xhepi i palltos.

Por, e moshuara e vëre kjo gjë. Në të njëjtën kohë ngjarjen po e ndiqte nga distanca edhe shqiptarja Arbenita Hoxha, 27-vjeçare, përcjell albinfo. Me të parë se gratë ia morën kuletën të moshuarës, Arbenita ndërhyn duke iu drejtuar me zë të lartë dy vjedhëseve sa që ato detyrohen të ikin nga aty pa kuletë, të cilën nga frika e lëshojnë.

Menjëherë pas kësaj, Arbenita njofton policinë. Përshkrimi që u bëri dy grave ishte aq i hollësishëm sa që policia i kapi ato shumë shpejt, afër vendin të ngjarjes. Bëhet fjalë për një 39-vjeçare dhe një 19 vjeçare, të dyja nga Bosnja.

Policia në Gütersloch ka marrë shkak nga veprimi i guximshëm i Arbenita Hoxhës, për t`i shprehur asaj mirënjohje në mënyre zyrtare. Në një bashkëbisedim të shkurtër, drejtori i policisë shprehu respekt për sjelljen e Arbenita Hoxhës.

Arbenitës, në fund i është dorëzuar një dhuratë e vogël në shenjë mirënjohjeje.