Si u shembën 4 mure për të shkuar te “thesari”

Policia e Tiranës zbulon skemën e grabitjes së bizhuterive dhe sendeve të tjera me vlerën e mbi 500 mijë eurove. Autorët eliminuan sistemin e alarmit dhe morën serverin e kamerave të sigurisë për të mos lënë gjurmë. Shoqërohen në komisariat 20 persona si të dyshuar se kanë dijeni për ngjarjen.

Katër mure të shembura për të arritur në “dhomën e thesarit”, prej aty grabitësit dalin me 500 mijë euro mall, ar dhe argjend bashkë.

Dy ditë pas grabitjes spektakolare të dyqanit të argjendarisë në Tiranë, policia ende nuk ka emra të dyshuar, por ka mundur që të dokumentojë mënyrën e grabitjes.

Dyshohet se tre persona të maskuar mesnatën e së shtunës kalojnë në një objekt në ndërtim pranë argjendarisë dhe që nga aty hapi një mur për të depërtuar në një restorant dhe më pas iu deshëm të shembnin edhe tri mure të tjera për të mbërritur në vitrinën dhe kasafortën e argjendarisë “Esenca”, në pronësi të Pavlo Sharkës.

Autorët arritën që të rrëmbenin mbi 500 mijë euro mall dhe më pas u larguan. Argjendaria kishte siguracion malli dhe gjithashtu edhe një kompani e sigurisë fizike kishte instaluar kamera dhe sisteme alarmi.

Para se të kalonin edhe murin e katërt dhe të fundit që i dërgonte pranë kasafortës dhe vitrinave me ar dhe argjend, autorët dyshohet se çaktivizuan sistemin e alarmit dhe njëkohësisht shkatërruan dhe morën edhe kamerat dhe serverin e pamjeve filmike.

Gjithçka e mirorganizuar dhe në fund kanë dalë me një sasi të madhe malli.

Pronari i argjendarisë Pavlo Sharka u shpreh menjëherë pas zbulimit të grabitjes se nuk është rasti i parë që bie pre e sulmeve.

Ndërsa djali i tij ka treguar dje me detaje mënyrën e grabitjes.

“Grabitësit kanë ardhur nga porta nga lagjja mbrapa dhe kanë ardhur këtu kanë çarë murin. Janë futur brenda dhe më pas kanë bërë dhe 3 vrima të tjera aty, kanë hapur një për lart ku është futur i pari dhe pastaj është hedhur poshtë ku ka shkëputur alarmin dhe kamerën e sigurisë dhe më pas ka hapur nga brenda dyqanit një vrimë tjetër që të futeshin dhe njerëz të tjerë” -tha Kristi Sharka.

Deri më tani policia nuk ka mundur të bjerë në gjurmët e autorëve, ndonëse janë shoqëruar në komisariat 20 persona.

Sipas hetuesve mes të ndaluarve ka edhe persona të dyshuar, por është shpejt të flitet për emra konkretë.

Tashmë me interes janë përgjigjet që do të dalin nga laboratori kriminalistik, për ndonjë gjurmë të mundshme të lënë në vendin e ngjarjes.

Hetuesit kanë marrë disa materiale që dyshohet se janë lënë ose prekur nga autorët e dyshuar, me shpresë se mund të këtë mbetur gjurmë prej tyre.

Gjithashtu në pyetje është marrë edhe pronari i objektit që ishte në rikonstruksion, vendi i parë nga ku grabitësit u futën, por rezultoi se nuk kishte asnjë dijeni, pasi nga ndërtesa mund të futej lirshëm nëpërmjet shkallëve.

Një grabitje e ngjashme ndodhi një muaj më parë në një filial të BKT-së në zonën e ish-Bllokut në Tiranë.

Dy grabitës përdorën bodrumin e një ish-kazinoje për të kaluar më pas në godinën e bankës dhe përfunduar në kasafortë ku morën rreth 21 milionë lekë të rinj.

Duket se kjo grabitje “frymëzoi” edhe personat që vendosën të futen në argjendarinë “Esenca” dhe marrë prej andej bizhuteri me vlerë mbi 500 mijë euro.

Efektivët e policisë kanë sekuestruar disa kamera sigurie të bizneseve pranë për të analizuar lëvizjet e dyshimta të ndodhura në mesnatën e së shtunës dhe në orët e para të mëngjesit të djeshëm.

Shpesh argjendaritë kanë rënë pre e grabitjeve të dhunshme ku autorët nën kërcënimin e armëve kanë mundur të marrin bizhu dhe objekte të tjera me vlerë.

Ndërsa grabitja e dy netëve më parë është konsideruar mjaft e sofistikuar, pasi autorët ndonëse shembën katër mure për të mbërritur deri pranë kasafortës së argjendarisë arritën që të merrnin gjithçka, duke shmangur dhe asgjësuar edhe sistemin e alarmit./mapo