SKANDALI/ Makinat e Ushtrisë transportojnë mobiliet e ministres Felaj

Pas propozimit të ministrit të Drejtësisë, Ylli Manjani, që ushtria të përdoret në luftën kundër kanabisit, ministrja e Mbrojtjes Mimi Kodheli, theksoi se Forcat e Armatosura duhet të trajtohen seriozisht.

Por ditën e sotme, disa media publikuan disa foto ku një kamion i Ushtrisë ishte në hyrjen e një pallati, ku po transportoheshin disa mobilie. Fillimisht u tha se automjeti i Ushtrisë po transportonte mobiliet e ministres së Shtetit për Marrëdhëniet me Parlamentin, Ermonela Felaj. Por kjo rezultoi e pavërtetë.

Sakaq, për lajmin ka reaguar Shtabi i Përgjithshëm i Forcave të Armatosura. Në një deklaratë për mediat, Komanda Mbështetëse e Forcave të Armatosura të Shqipërisë sqaron se bëhet fjalë për banesën e kapitenit Marlon Nasi. Sipas një urdhri të Ministrisë së Mbrojtjes, “çdo ushtaraku që ndërron banesë i sigurohet një mjet për transportin e orendive shtëpiake, nga njëra banesë në tjetrën”.

“Dëshirojmë të sqarojë opinionin publik lidhur me disa foto të publikuara në rrjetet sociale, ku shfaqet një mjet dhe efektivë të Forcave të Armatosura duke transportuar orendi shtëpiake.

Komanda Mbështetëse bën me dije se në bazë të urdhrit nr. 411 datë 02.09.2003 të ministrit të Mbrojtjes, çdo ushtaraku që ndërron banesë i sigurohet një mjet për transportin e orendive shtëpiake, nga njëra banesë në tjetrën.

Në bazë të urdhrit nr. 411 datë 02.09.2003 të ministrit të Mbrojtjes është përgatitur urdhri nga komandanti i Batalionit të Transportit për vënien në dispozicion të transportit të orendive shtëpiake të kapiten Marlon Nasi, nga banesa e tij e mëparshme te Restorant Durrësi, për tek banesa e tij e re te Rruga e Elbasanit.

Komanda Mbështetëse vlerëson se publikimi në fjalë është në rastin më të mirë, i pasaktë dhe në rastin më të keq, është dashakeq dhe që kërkon keqinformojë publikun dhe të cënojë punën e Forcave të Armatosura.

Komanda Mbështetëse e Forcave të Armatosura inkurajon çdo media apo individ të denoncojnë me fakte çdo rast abuziv që ka të bëjë me punën e kësaj njësie të rëndësishme të FA”, thuhet në reagimin e Komandës Mbështetëse.