SKANDALI/ Pronarët në qendër të Tiranës: Mirë Bashkia na “vodhi” pronën, por s’po na japin lekët

Janë 10 trungje familjare, tiranas të vjetër, që duhet të përfitojnë 100 milionë lekë të reja shpronësime nga ndërtimi i galerisë për nënstacionin elektrik në qendër të Tiranës, por praktikisht, deri tani, nuk kanë marrë asnjë lekë.

Edhe pse nënstacioni po ndërtohet në truallin e familjeve të vjetra tiranase në qendër të kryeqytetit, ministria e Financave, Ministria e Zhvillimit Urban, dhe Bashkia Tiranë, nuk kanë hedhur asnjë hap për të kompesuar pronarët e vërtetë.

A është kjo kaprico e ministrive dhe institucioneve në varësi të qeverisë? Ndoshta po. Qeveria ka marrë vendimin për shpronësimin për interës public të 10 familjeve tiranase, por gjithë këto familje, akuzojnë Bashkinë se ua ka marrë truallin.

Iljaz Këllezi, një nga përfituesit dhe pronarët e truallit të pronës pas 15-katëshit, ku është vendosur nënstacioni, thotë se të gjitha familjet, jo vetëm që nuk kanë marrë asnjë lek, por prona u është marrë nga Bashkia.

“Lekët nuk janë marrë fare. Procedurat për zbatimin e vendimit të qeverisë të 7 shtatorit nuk di pse nuk zbatohen. Aq më tepër, që trualli, pra prona jonë, është marrë nga bashkia. Ne nuk jemi pronarë, edhe pse jemi pronarë” thotë Iliaz Këllezi, një ndër përfituesit e 93 milionë lekëve, sipas dokumenteve të konfirmuara nga ZVRPP, dhe e specifikuar e tillë edhe në vendimin e qeverisë.

“Kemi hapur gjyq kundër gjithë institucioneve shtetërore, jo vetëm për truallin që na e ka marrë bashkia, por edhe lekët që nuk kemi marrë. Madje, edhe për vlerësimin e çmimit” thotë Iljaz Këllezi për newsbomb.al.

Genc Këllezi, shkon edhe më tej, kur e konsideron këtë një “rrëmbim” të pronës nga ana e bashkisë së Tiranës.

“Me logjikë, përderisa ka një vendim të Këshillit të Ministrave, duhet fillimisht të kompensohen pronarët sipas VKM dhe pastaj trualli të merret në pronësi të bashkisë. Kjo nuk ka ndodhur. Eshtë burokracia shtetërore dhe më pas korrupsioni” thotë Genc Këllezi pronar trualli në qendër të Tiranës.

Nënstacioni në fakt është ngritur. Por trualli ka kaluar në pronësi të bashkisë, ndërkohë që pronarët nuk kanë marrë lekët.

Janë familjet Karaj, Malja, Cellku, Kore, Gjerazi, Buli, Trebicka, Axha, Gëdeshi, Samarxhia, Geci, Buneci, Dashi, Pulaj, Hallulli, Skënderi, Pilinci, Daka, Fortuzi, Durda, Vathi dhe Këllezi që janë në pritje të katrahurës me institucionet, por edhe në pritje të parave, që edhe pse nuk janë dakord, duan të ketë një zgjidhje të menjëhershme.

Familjet që sipas VKM duhet të marrin paratë

Karaj, Malja, Çeliku 13,527,738 lekë

Kore, Gjerazi 5,705,759 lekë

Sabire Jaup Kore 5,652,184 lekë

Buli, Trebicka 26,530,840 lekë

Axha, Gëdeshi, Samarxhia 2,678,760 lekë

Geci 4,687,830 lekë

Buneci 2,477,853 lekë

Dashi, Pulaj, Hallulli, Fortuzi

Skënderi, Pilinci, Daka, Durda, Vathi 6,562,962 lekë

Iljaz Këllezi 9,375,660 lekë

prona
prona-1

prona2