Sot miratohet ligji i SPAK/ Gjyqtarët dhe politikanët në sitë, ja ndryshimet më të fundit

Kuvendi do të miratojë sot ligjin për luftën ndaj korrupsionit, duke i hapur rrugë ngritjes së Prokurorisë Speciale dhe Byrosë Kombëtare të Hetimit. Por çfarë do të ndodhë pas miratimit të këtij ligji? Me hyrjen e tij në fuqi, SHBA dhe BE do nisin punën për arrestimin e të gjithë prokurorëve dhe zyrtarëve të korruptuar.

Sipas përcaktimeve në ligj, çdo gjyqtar dhe prokuror që do jetë pjesë te SPAK më parë duhet që të verifikohet me imtësi dhe të heqë dorë nga privatësia. Ata do jenë gjatë gjithë kohës në përgjim, teksa do u verifikohen dhe kontrollohen vazhdimisht llogaritë bankare të tyre dhe të të afërmve. Por pasi të ngrihet struktura antikorrupsion, do nisë beteja për të dërguar pas hekurave këdo që ka abuzuar me pushtetin. Sipas përcaktimeve kushtetuese, do të kalojnë në hetim të gjithë zyrtarët e nivelit të lartë përgjatë 25 viteve të fundit, konkretisht: Presidenti i Republikës, Kryetari i Kuvendit, Kryeministri, anëtarët e Këshillit të Ministrave, gjyqtarët e Gjykatës Kushtetuese dhe të Gjykatës së Lartë, Prokurori i Përgjithshëm, Inspektori i Lartë i Drejtësisë, Kryetari i Bashkisë, deputeti, zëvendësministrat, anëtari i Këshillit të Lartë Gjyqësor dhe Këshillit të Lartë të Prokurorisë dhe drejtues të institucioneve qendrore ose të pavarura të përcaktuara në Kushtetutë ose në ligj, si dhe akuzat kundër ish-funksionarëve të sipërpërmendur.

Disa muaj më parë, ambasadori Lu e paralajmëroi se Byroja dhe Struktura Speciale do jenë në dorë të amerikanëve, pasi do vijnë agjentë të FBI. Po ashtu do të ndiqet modeli kroat dhe rumun. Rasti tipik i dërgimit pas hekurave të të korruptuarve është Kroacia, pasi ish-kryeministra, ministra, diplomatë e ushtarakë kanë përfunduar pas hekurave. Edhe në vendin tonë do të ndodhë një gjë e tillë dhe palët kanë nisur ta kuptojnë një gjë të tillë.

Gjatë diskutimeve të ditëve të fundit, ligji për SPAK ka pësuar një sërë ndryshimesh. Përmes tij u hapet rruga prokurorëve të hetojnë njëri-tjetrin edhe pa pasur prova. Po ashtu kanë ndryshuar procedurat dhe kriteret e emërimit të gjyqtarëve të SPAK dhe të prokurorëve të Byrosë së Hetimit.

Sipas ligjit, me ngritjen e institucioneve të gjitha dosjet që ka prokuroria do kalojnë te SPAK dhe zyrtarët që janë në hetim do duhet të përballen me drejtësinë.